Շտապօգնության խումբն ահազանգել է, որ տանտերն իրեն ոչ ադեկվատ է պահում

Սեպտեմբերի 26-ին «Հրազդան» բժշկական կենտրոնից ՆԳՆ ոստիկանության Կոտայքի մարզի օպերատիվ կառավարման կենտրոն ահազանգել էին, որ Հրազդան քաղաքի Միկրոշրջան թաղամասի 24 շենքի բնակարաններից մեկը կանչով մեկնած շտապօգնության խումբը խնդրում է ոստիկանների օգնությունը, քանի որ 39-ամյա տանտերը ոչ ադեկվատ է պահում իրեն։

Ոստիկանությունից հայտնում են, որ րոպեներ անց ստացվել էր հաջորդ հաղորդումը. նույն շենքի մոտից շտապօգնության խումբը պարանոցի կտրած-ծակած վերքով բուժօգնության էր տեղափոխել Դդմաշեն գյուղի 40-ամյա մի բնակչի:

Նշված հասցե են մեկնել ոստիկանության Հրազդանի բաժնի օպերատիվ խումբը և Կոտայքի մարզի պարեկները։ Ձեռնարկված օպերատիվ-հետախուզական միջոցառումների արդյունքում պարզվել է, որ Միկրոշրջան թաղամասի 24 շենքի բակում վիճաբանություն էր եղել, որի ընթացքում էլ նույն շենքի 39-ամյա բնակիչը դանակով խփել էր հիվանդանոց տեղափոխված 40-ամյա տղամարդուն։

Հրազդան քաղաքի 39-ամյա բնակիչը ձերբակալվել, և կազմված փաստաթղթերով հանդերձ, ներկայացվել է Կոտայքի մարզային քննչական վարչություն։

Հանգամանքները նախաքննությամբ պարզվում են։