«Այս ընտրություններին չեն մասնակցում «տասովչիկները»». Գուրգեն Արսենյանը՝ ընտրությունների՝ պասիվ լինելու մասին

Այս ընտրություններին մասնակցության ցուցանիշը նախորդներից ցածր էր 2 կարեւոր բաղադրիչով պայմանավորված: Այս մասին News.am-ի հետ զրույցում ասաց ՔՊ-ական պատգամավոր Գուրգեն Արսենյանը:

«Առաջին կարեւոր բաղադրիչը այն է, որ այս ընտրություններին չեն մասնակցում «տասովչիկները», այն մարդիկ, որոնք թաղում զբաղված են լինում մարդկանց տներից հանելով, տեղամաս հասցնելով: Այդ պատճառով ինչ-որ մաս ունենալով իր համակրանքը կամ հակակրանքը՝ չի գնում ընտրության:

Երկրորդ բաղադրիչն այն է, որ էապես վերացել է մարդկանց խրախուսումը, այսինքն՝ ընտրողի որեւէ մեխանիզմ չի գործում: Այդ խրախուսման մեխանիզմը բերում էր նրան, որ մարդիկ կատարում են իրենց ստանձնած պարտավորությունները:

Մարդիկ այս պահին դարձել են ավելի ապաքաղաքական ու այս ընտրություններին մասնակցությունը հասարակական-քաղաքական մասն է գալիս»,- ընդգծեց Գուրգեն Արսենյանը:

Հարցին՝ արդյո՞ք կուսակցությունում այժմ քննարկվում է այլ ուժի հետ կոալիցիա կազմելու հարցը, Արսենյանն ասաց. «Այս պահին կուսակցությունում գնում է քննարկում ոչ թե ինչ-որ ուժի հետ միավորվելու, այլ արդյունքների հաշվարկ»:

Պատգամավորն ասաց, որ ինքն ավելի բարձր ցուցանիշ էր ակնկալում. «Կարծում եմ, որ մեր աջակիցների մի զանգված չի իրականացրել ընտրելու ցանկությունը: Ընտրության օրը համընկել է մեր եկեղեցական տոներից մեկի հետ, եւ դա բերել է նրան, որ ընտրողների մի զգալի ծավալ զբաղված է դրանով: Որոշ մարդիկ օրինակ՝ իմ տան խոհարարը առավոտվանից տեղափոխվել էր Հանքավան, որովհետեւ ինքը պարտադիր ներկա պիտի լիներ»: