Հայաստանի տարբեր մարզերի ստեղծագործական խմբերը ներկայացան մեկ բեմում

Հայաստանի 5 մարզերի շուրջ 200 տաղանդավոր երեխաներ ներկայացել են Արմավիրի մշակույթի պալատում՝ Մոսկվայի 876-րդ տարեդարձին նվիրված համերգի շրջանակում։ Միջոցառումը կազմակերպել էր Երևանում «Դոմ Մոսկվի» մոսկովյան մշակութագործարարական կենտրոնը՝ Արմավիրի մարզպետարանի աջակցությամբ:

Ինչպես տեղեկանում ենք «Դոմ Մոսկվի»-ի տարածած հաղորդագրությունից, Արագածոտնի, Արմավիրի, Վայոց Ձորի, Շիրակի և Կոտայքի մարզերի ստեղծագործական խմբերն ու կատարողները ներկայացրել են հայկական և ռուսական ժողովրդական, ժամանակակից երգեր ու պարեր: Համերգը վարում էր Ղրիմի վաստակավոր արտիստ Վերոնիկա Պրավդնիկովան, ով կատարեց նաև Ռուսաստանի մայրաքաղաքին նվիրված հայտնի երգեր: Միջոցառման հատուկ հյուրը Օպերայի և բալետի ազգային թատրոնի «Երիտասարդական օպերային ծրագրի» մենակատար Ֆերդինանդ Մուրադյանն էր։

«Երևանում «Դոմ Մոսկվի» կենտրոնը հատուկ ուշադրություն է դարձնում երեխաների ստեղծագործական զարգացմանը՝ փորձելով ամեն կերպ օգնել և աջակցել նրանց նախաձեռնություններին։ Հույս ունեմ՝ այս նախագիծը կոգևորի ու կոգեշնչի մեր տաղանդավոր երեխաներին և խթան կդառնա նրանց հետագա ստեղծագործական կյանքի համար։ Նախագծի նպատակն էր նաև ներկայացնելու հայկական և ռուսական մշակույթների ընդհանրությունները»,- նշել է Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը։

Վահրամ Կարապետյանը շնորհակալագրեր է հանձնել բոլոր համույթներին ՝ Մոսկվայի 876-ամյակին նվիրված միջոցառումների անցկացման գործում ակտիվ մասնակցության և ներդրած ավանդի համար:

«Նման միջոցառումները կարևոր են մարզերում ստեղծագործական ակտիվությունը խթանելու համար: Ուրախ ենք այստեղ տեսնել այնքան տաղանդավոր ու շնորհալի երեխաների, ովքեր հիացրեցին մեզ իրենց կատարումներով», – նշել է Արմավիրի մարզպետարանի կրթության, մշակույթի և սպորտի վարչության պետ Սոնյա Բուդաղյանը։

Միջոցառման ավարտին բոլոր մասնակիցներին սպասվում էր անակնկալ։ ՀՀ-ում ՌԴ ԱԴԾ Սահմանապահ վարչությունը պատրաստել էր իսկական դաշտային խոհանոց՝ շիլայով և թեյով։

Մոսկվայի 876-ամյակին նվիրված միջոցառումներն անցկացվում են Մոսկվայի կառավարության, Մոսկվայի արտաքին տնտեսական և միջազգային կապերի դեպարտամենտի, ՀՀ-ում ՌԴ դեսպանության և Երևանի քաղաքապետարանի աջակցությամբ։