Ինչո՞ւ Վահագն Խաչատուրյանը չի շնորհավորել Սամվել Շահրամանյանին

Հայկական երկրորդ պետությունն անցած շաբաթ օրը նախագահ ընտրեց։ Սամվել Շահրամանյանը, խորհրդարանական ուժերի մեծամասնության ձայներով, դարձավ նախագահ։

Մի քանի օր պետնախարարի պաշտոնը զբաղեցրած, ապա նախագահ դարձած Շահրամանյանին շնորհավորական բազմաթիվ ուղերձներ հղվեցին, սակայն, ինչպես և սպասվում էր, Հայաստանի իշխանությունները որևէ կերպ չանդրադարձան այդ փաստին։

Այսպես, ո՛չ Նիկոլ Փաշինյանը, ո՛չ ԱԺ նախագահ Ալեն Սիմոնյանը, ո՛չ նախագահ Վահագն Խաչատուրյանը չեն շնորհավորել Սամվել Շահրամանյանին, թեև մինչ այս չէր եղել որևէ դեպք, որ Հայաստանի իշխանթյունները նման անտարբերություն ցուցաբերեին և անգամ մեկ տողով չանդրադառնային հայկական երկրորդ պետությունում տեղի ունեցած նման իրադարձությանը։

Ընդդիմության դաշտում լրիվ հակառակ պատկերն էր․ թե՛ խորհրդարանական, թե՛ արտախորհրդարանական ուժերը հերթով շնորհավորեցին Սամվել Շահրամանյանին և հույս հայտնեցին, որ այս ընտրությունից հետո գերության մեջ գտնվող Արցախի համար նոր հնարավորությունների դաշտ կստեղծվի։

Թեև վերջին ներքաղաքական զարգացումները պարզ են դարձնում, թե ինչու ՀՀ իշխանությունները չեն շնորհավորել Արցախի նոընտիր նախագահին, այնուամենայնիվ, MediaHub.am-ը փորձեց նաև լսել չշնորհավորող կողմին։ ՀՀ նախագահ Վահագն Խաչատուրյանի աշխատակազմի տեղեկատվության ազատության ապահովման պատասխանատու Աղասի Մարգարյանը մեր հարցին պատասխանեց կարճ և կոնկրետ․

«Չեմ մեկնաբանում»,- ասաց նա։

Եվ այո՛, ինչպե՞ս մեկնաբանել այն, ինչ տեղի է ունենում Հայաստանի ներքաղաքական կյանքում․ թերևս հեշտ չէ ասել, որ «աղան կբարկանա», եթե իր վարած քաղաքականությանը դեմ արտահայտվող մարդկանց շնորհավորեն։

Վարչապետի աշխատակազմ զանգահարել այս հարցով անիմաստ գործողություն ենք համարում. Նիկոլ Փաշինյանը 2020 թվականի արյունալի պատերազմից հետո ոտք չի դրել Արցախ (նույն՝ «աղան կբարկանա» նկատառումներից ելնելով), իսկ մեկ տարի առաջ Պրահայում հայտարարեց, որ Արցախը Ադրբեջանի մաս է ճանաչում...