Ակնայով Ռուսաստանի կողմից ուղարկված հումանիտար բեռը Արցախ չի մտել

Ռուսաստանի կողմից Ակնայով ուղարկված հումանիտար բեռը դեռ Արցախ չի մտել։

Այս մասին «Փաստինֆոյի» հետ զրույցում ասաց Ակնա - Ստեփանակերտ ճանապարհին հսկողություն իրականացնող Արցախի Մեսրոպ Մաշտոց Համալսարանի Կովկասագիտության կենտրոնի ղեկավար Հովիկ Ավանեսովը։

«Այս պահին շարունակում ենք հերթապահություն իրականացնել։ Ադրբեջանական կողմից դեռ որևէ տեղաշարժ չկա, դեպի Արցախ եկող որևէ բեռնատար չենք նկատել»։
Հարցին, թե արդյոք թույլ են տալու որպեսզի հումանիտար բեռն անցնի Արցախ, նա պատասխանեց, որ իրավիճակի հետ կապված ընթացքում որոշում կկայացվի։

Հիշեցնենք, որ նախօրեին ռուսական և ադրբեջանական լրատվամիջոցներն հայտնեցին, որ Ռուսաստանն Ակնա - Ասկերան ճանապարհով հումանիտար բեռ է ուղարկում Արցախ։
Նշվում էր, որ բեռը ռուս - ադրբեջանական սահմանը հատել է ժամը 14։30-ին մոտ, դրանից հետո այն շարժվում է դեպի Բաքու, այնտեղից էլ Ակնա-Ասկերան։

Ավելի ուշ Արցախի տեղեկատվական շտաբն հայտնեց, որ Արցախի Հանրապետության իշխանությունները, ելնելով Ադրբեջանի կողմից իրականացվող լիակատար շրջափակման հետևանքով առաջացած սուր հումանիտար խնդիրները մեղմելու անհրաժեշտությունից, որոշել են թույլ տալ Ասկերան քաղաքով ռուսական բեռների մուտքը մեր հանրապետություն:

Միաժամանակ ընդգծվել էր, որ ձեռք է բերվել պայմանավորվածություն, համաձայն որի՝ Լաչինի միջանցքով վերականգնվելու են հումանիտար բեռնափոխադրումները ռուս խաղաղապահների ու Կարմիր խաչի միջազգային կոմիտեի կողմից: