Ռուսական ուժերը հարձակվել են Ուկրաինայի արևելքում գտնվող Կոնստանտինովկայի վրա, զոհվել են խաղաղ բնակիչներ

Ուկրաինայում ընթացող մարտական գործողությունների մասին վերջին լուրերի համաձայն՝ ռուսական զորքերը հրետակոծել են Ուկրաինայի Դոնեցկի մարզի Կոնստանտինովկա բնակավայրի կենտրոնական շուկան: Արկերի ընկնելուց հետո առևտրային տաղավարներում հրդեհ է բռնկվել, ինչի հետևանքով զոհվել է 16 խաղաղ բնակիչ, այդ թվում՝ երեխա, ևս 31 մարդ ստացել է տարբեր աստիճանի վնասվածքներ:

Ուկրաինայի նախագահ Վոլոդիմիր Զելենսկին հրապարակել է հարվածի տեսագրությունը և ընդգծել. «Կրակի տակ են հայտնվել շուկան, խանութները, դեղատունը, մարդիկ, որոնք ոչ մի վատ բան չեն արել, բազմաթիվ վիրավորներ կան: Ցավոք, զոհերի և վիրավորների թիվը կարող է աճել։

Ցավակցում եմ բոլոր նրանց, ովքեր կորցրել են իրենց սիրելիներին: Ռուսական այս չարիքը պետք է որքան հնարավոր է շուտ հաղթահարվի»,- ասել է նախագահը։

Նախնական տվյալներով՝ վնասվել են 20 խանութ, 8 առևտրային օբյեկտ, էլեկտրահաղորդման գծեր, վարչական և բնակելի շենք, այրվել են ավտոմեքենաներ: Ներկայումս իրականացվում է որոնողափրկարարական գործողություն: Ենթադրվում է, որ փլատակների տակ դեռ մարդիկ կան։