«Գարդման-Շիրվան-Նախիջևան» միությունը կոչ է անում միջազգային հանրությանը գործուն քայլեր ձեռնարկել Լաչինի միջանցքի բացման համար

Լեռնային Ղարաբաղի անկախության 32-ամյակին «Գարդման-Շիրվան-Նախիջևան» համահայկական միությունը կոչ է անում ադրբեջանական իշխանություններին հավատարիմ մնալ նոյեմբերի 9-ի եռակողմ հայտարարությանը՝ ապահովելով Լաչինի միջանցքով մարդկանց և բեռների երկկողմանի անարգել և անխոչընդոտ տեղափոխումը:

«Արմենպրես»-ի փոխանցմամբ՝ միության տարածած հայտարարության մեջ ասված է.

«Գարդման-Շիրվան-Նախիջևան» համահայկական միությունը հպարտությամբ շնորհավարում է Լեռնային Ղարաբաղի Հանրապետության անկախության հռչակման 32-ամյակը։ 1991թ. սեպտեմբերի 2-ին Ստեփանակերտում տեղի ունեցավ պատգամավորների մարզային և Շահումյանի շրջանային խորհրդի համատեղ նստաշրջան, որն ընդունեց «Հռչակագիր Լեռնային Ղարաբաղի Հանրապետության հռչակման մասին»։ Այս որոշումը կայացվել է ԽՍՀՄ Սահմանադրությանը, օրենսդրությանը, տեղական իրավական ակտերին, ինչպես նաև միջազգային իրավունքի նորմերին համապատասխան, ինչն ամրագրվել է նույն թվականի դեկտեմբերի 10-ին տեղի ունեցած անկախության հանրաքվեով։

Լեռնային Ղարաբաղի անկախության հռչակումը ադրբեջանական իշխանություների կողմից տարվող հայատյացության և խտրականության քաղաքականության հետևանքն էր, որի շուրջ ձևավորվել է հայության նկատմամբ անհանդուրժողականության մթնոլորտ։ Ասվածի խոսուն ապացույցն են 1988թ․ Սումգայիթի, 1990թ․ Բաքվի, 1992թ․ Մարաղայի հայկական կոտորածները։ Ադրբեջանում պետականորեն տարվող այս քաղաքականությունը հանգեցրել է նաև այդ երկրում բնակվող հարյուր հազարավոր հայերի տեղահանմանը և փախստական դառնալուն։

Անկախության հռչակումից 32 տարի անց Լեռնային Ղարաբաղի հայությունը կրկին կանգնել է Ադրբեջանի կողմից էթնիկ զտման և ցեղասպանման վտանգի առաջ։ Լաչինի միջանցիքի 9 ամսյա շրջափակումը առաջացրել է աղետալի հումանիտար ճգնաժամ։ Առաջին անհրաժեշտության ապրանքների, պարենի, դեղորայքի մատակարարման դադարեցումը, գազամատակարարման, էլեկտրաէներգիայի սնուցման խոչընդոտումը, ջրի սղությունը, գյուղատնտեսական աշխատանքների, բնակչության ազատ տեղաշարժի խոչընդոտումը Լեռնային Ղարաբաղի 120 հազար հայ բնակչությանը կանգնեցրել է գոյության պահպանման իրական վտանգի առաջ։

Մի շարք միջազգային հեղինակավոր կառուցներ և անձինք դատապարտել են Ադրբեջանի կողմից էթնիկ զտման քաղաքականությունը։ 2023թ․ փետրվարի 21-ին Արդարադատության միջազգային դատարանն իրավաբանորեն պարտադիր ուժ ունեցող որոշում ընդունեց՝ պարտավորեցնելով Ադրբեջանին բոլոր անհրաժեշտ միջոցները ձեռնարկել Լաչինի միջանցքով անխափան տեղաշարժ ապահովելու նպատակով և 2023թ. հուլիսի 17-ին վեարաստատեց այն։ Միջազգային քրեական դատարանի նախկին առաջին գլխավոր դատախազ Լուիս Մորենո Օքամփոն Լեռնային Ղարաբաղում տեղի ունեցողը բնութագրել է որպես ցեղասպանություն։ Սակայն Ադրբեջանը շարունակում է անտեսել ինչպես միջազգային դատարանի վճիռները, այնպես էլ հեղինակավոր անձնաց կոչերը։

Լեռնային Ղարաբաղի անկախության 32-ամյակին «Գարդման-Շիրվան-Նախիջևան» համահայկական միությունը կոչ է անում.

միջազգային հանրությանը՝

- գործուն քայլեր ձեռնարկել՝ Լաչինի միջանցքով մարդկանց և բեռների երկկողմ անխափան տեղափոխությունն ապահովելու, կենսագործունեության արժանապատիվ պայմանների ստեղծման և միջազգային բոլոր փաստաթղթերով սահմանված Լեռնային Ղարաբաղի հայության իրավունքների և ազատությունների լիակատար ապահովման համար։

ադրբեջանական իշխանություններին՝

- հավատարիմ մնալ նոյեմբերի 9-ի եռակողմ հայտարարությանը՝ ապահովելով Լաչինի միջանցքով մարդկանց և բեռների երկկողմանի անարգել և անխոչընդոտ տեղափոխումը,

- իրականացնել նոյեմբերի 9-ի եռակողմ հայտարարությամբ սահմանված, ներքին տեղահանվածների և փախստականներ վերադարձը Լեռնային Ղարաբաղի տարածք և հարակից տարածքներ՝ ՄԱԿ-ի Փախստականների հարցերով գերագույն հանձնակատարի գրասենյակի հսկողության ներքո»։