Եղբայրը սեռական հարաբերություններ է ունեցել իր 2 քույրերի հետ, որոնցից մեկն անչափահաս է եղել․ գործը դատարանում է

19-ամյա Կարեն Հ․-ին մեղադրանք է առաջադրվել իր անչափահաս քրոջ նկատմամբ սեքսուալ բնույթի բռնի գործողություններ կատարելու համար և ոչ միայն։

Iravaban.net-ը «Դատալեքս» դատական-տեղեկատվական համակարգից տեղեկանում է, որ 2023 թվականի ապրիլի 19-ին Կարեն Հ․-ի նկատմամբ հանրային քրեական հետապնդում է հարուցվել։ Մեղադրյալը 2022 թվականից մինչև 2023 թվականը՝ քննությամբ չպարզված ժամանակահատվածում իր անչափահաս քրոջ՝ 2009 թվականին ծնված Ն․ Հ․-ի կամքին հակառակ և նրա կամքն անտեսելով, վերջինիս հետ պարբերաբար ունեցել է սեռական հարաբերություններ, նրա նկատմամբ կատարել է սեքսուալ բնույթի այլ գործողություններ։

Բացի այդ, քննությամբ չպարզված ժամանակահատվածում իր քրոջ՝ 2003 թվականին ծնված Ս․ Հ․-ի կամքին հակառակ և նրա կամքն անտեսելով, վերջինիս նկատմամբ նույնպես կատարել է սեքսուալ բնույթի գործողություններ․ «․․․Իրենց տանը ստիպողաբար հանել է քրոջ և իր հագին առկա հագուստները, քրոջը պառկեցրել է իր կողքին, ինչից հետո համբուրելով և շոշափելով վերջինիս մարմնի տարբեր հատվածները՝ բավարարել է իր սեռական կարիքները»:

Նա ֆիզիկական ցավ է պատճառել ինչպես իր քույրերին, այնպես էլ 2005 թվականին ծնված իր եղբորը․ «․․․2 անգամ ոտքով հարվածել է նրա ոտքի վերին հատվածին, 1 անգամ փայտով հարվածել է նրա մեջքին և բռնել է կոկորդից՝ պատճառելով ֆիզիկական ցավ»:

Գործը մակագրվել է Տավուշի մարզի առաջին ատյանի ընդհանուր իրավասության դատարանի դատավոր Սամվել Մարդանյանին։

Դատարանի՝ 2023 թվականի ապրիլի 21-ի որոշմամբ քննիչի միջնորդությունը բավարարվել է, թույլատրվել է մեղադրյալին մեկ ամիս ժամկետով տեղավորել ԱՆ «Հոգեկան առողջության պահպանման ազգային կենտրոն» ՓԲ ընկերությունում` ստացիոնար դատահոգեբուժական փորձաքննության կատարման համար:

Ամբաստանյալը ապրիլի 18-ից կալանավորված է։ Օգոստոսի 11-ին դատարանում քննարկվել է մեղադրյալի խափանման միջոցի երկարաձգման հարցը: Հանրային մեղադրող Գևորգ Հակոբյանը խափանման միջոցի վերաբերյալ դիրքորոշում հայտնելով՝ նշել է, որ մեղադրյալ Կարեն Հ․-ի նկատմամբ ընտրված է ճիշտ խափանման միջոց և կալանավորման ժամկետը անհրաժեշտ է երկարաձգել ևս 3 ամիս ժամկետով: Անչափահաս տուժողների օրինական ներկայացուցիչ Արփինե Ալավերդյանը միացել է հանրային մեղադրողին:

Կարեն Հ․-ի պաշտպան Ժաննա Չիլինգարյանը դիմելով դատարանին՝ հայտնել է, որ իր պաշտպանյալի նկատմամբ կարելի է կիրառել ավելի մեղմ խափանման միջոց, միջնորդել է նրա նկատմամբ որպես խափանման միջոց կիրառել տնային կալանք:

Մեղադրյալը դատարանում հայտարարել է, որ միանում է իր պաշտպանի միջնորդությանը և ցանկանում է տանը լինել, քանի որ հայրը հաշմանդամ է և ցանկանում է նրան խնամել:

Դատարանը հիմնավոր է համարել այն, որ մեղադրյալ Կարեն Հ․-ն մնալով ազատության մեջ կարող է կատարել այլ հանցանք, հաշվի առնելով վերագրվող արարքների պարբերականությունը, նույնասեռ լինելու հանգամանքը: Դատահոգեբուժական ստացիոնար փորձաքննության եզրակացության համաձայն` մեղադրյալը տառապել և տառապում է «թեթև աստիճանի մտավոր հետամնացություն վարքային խանգարումներով», որը արտահայտված չէ ծանր աստիճանի և չի ուղեկցվում լրիվ հոգեբանական ախտանիշներով, հիշողության կոպիտ խանգարումներով, որ ինչպես հանրորեն վտանգավոր արարքներ կատարելիս, այնպես էլ ներկայումս լիովին զրկեր և զրկի նրան գիտակցել իր գործողությունների բնույթը, նշանակությունը, վտանգավորությունը, հաշիվ տալ իրեն կատարած արարքների համար և ղեկավարել դրանք, այլ սահմանափակում է այն:

«․․․Հանրորեն վտանգավոր արարքները կատարելիս փորձաքննվողը չի գտնվել նաև հոգեկան գործողության որևէ ժամանակավոր հիվանդագին խանգարված վիճակում, որը կարող էր զրկել նրան գիտակցել իր գործողությունների վտանգավորությունը և ղեկավարել դրանք, այլ ըստ փորձաքննվողի՝ գտնվել է ալկոհոլ գործածած վիճակում /սթափության թերթիկը բացակայում է/: Ուստի իրեն մեղսագրվող արարքի նկատմամբ Կարեն Հ․-ին հարկ է ճանաչել սահմանափակ մեղսունակ: Իր ներկա հոգեկան վիճակով նա կարող է մասնակցել դատաքննչական գործողություններին։ Դատարանը գտնում է, որ մեղադրյալն ազատության մեջ մնալով և վերը նշված հոգեկան առողջության հետ կապված խնդիրների պատճառով չի կատարի իր վրա քրեական դատավարության օրենսգրքով և դատարանի որոշմամբ դրված պարտականությունները»,-նշվում է դատարանի որոշման պատճառաբանական մասում:

Դատարանը գտնել է, որ մեղադրյալ Կարեն Հ․-ի նկատմամբ որպես խափանման միջոց ընտրված կալանավորման ժամկետը անհրաժեշտ է երկարաձգել 3 ամիս ժամկետով, իսկ պաշտպանի միջնորդությունը՝ վերջինիս նկատմամբ այլընտրանքային խափանման միջոց` տնային կալանք կիրառելու մասին պետք է մերժել:

Հաջորդ դատական նիստը նշանակվել է սեպտեմբերի 14-ին։