Վարունգի օգտակար հատկությունները

Վարունգը ֆիտոնուտրիենտների՝ ֆլավոնոիդների, լիգնանների, տրիտերպենների աղբյուր է, որոնք հայտնի են հակաօքսիդանտ, հակաբորբոքային հատկություններով։ Վարունգի կեղևը և սերմերն ամենաօգտակարն են. պարունակում են բջջանյութ, բետա-կարոտին, կալցիում։

Վարունգը միներալների և վիտամինների աղբյուր է։ Ցածր կալորիականության շնորհիվ համարվում է դիետիկ սննդակարգի կարևորագույն բաղադրիչներից։ Բանջարեղենը հայտնի է հակադիաբետիկ, հիպոլիպիդեմիկ, հակաբորբոքային, հակաօքսիդանտ, օրգանիզմը մաքրող հատկություններով։

Վարունգի թարմ հյութն ունի հանգստացնող հատկություն, նվազեցնում է այտուցվածությունը, արևային այրվածքների դեպքում նվազեցնում է ցավը։

Aysor.am-ի փոխանցմամբ՝ վարունգը կենսական է ջրազրկման դեմ պայքարում։ Հարուստ է բջջանյութով, որը բարելավում է մարսողությունը, կարգավորում է միկրոֆլորան։ Վարունգը հարուստ է նաև հեշտ յուրացվող կալցիումով, որ խիստ անհրաժեշտ է ոսկրերի առողջության համար։

Վիտամին C-ն նվազեցնում է օրգանիզմում քրոնիկ բորբոքային գործընթացները, օգտակար է սիրտ-անոթային համակարգի համար, հակաօքսիդանտները նպաստում են իմունային համակարգի ամրապնդմանը։

Վարունգը նաև օգնում է ազատել երիկամները և միզապարկը տոքսիններից։ Մագնեզիումի պարունակության շնորհիվ վարունգն օգնում է կարգավորել արյան ճնշումը։ Վարունգի օգտագործումը բարելավում է նաև մազերի, մաշկի որակը։

Ֆլավոնոիդների մեծ քանակությունը, հակաօքսիդանտները պաշտպանում են օրգանիզմն ազատ ռադիկալներից։