«Մեր նպատակներն այլ են, իշխանությանը՝ այլ»․ հեղափոխությունն այլեւս «պահապան» չունի

2018 թվականի իշխանափոխությունից հետո ձեւավորված «Հեղափոխության պահապաններ» խմբի հիմնադիր Հայկ Ստեփանյանը ֆեյսբուքյան ուղիղ եթերում պատմել է, որ խմբավորումն այլեւս կապ չունի իշխանության հետ, եւ որ ինքը հրաժարվել է պաշտոնի բոլոր առաջարկներից։

«Ընդհանրապես ցանկություն չկա որեւէ պաշտոն վերցնելու, որովհետեւ մեր նպատակները չեն համընկնում իշխանության հետ։ 2018 թվականից եղել ենք, այո, իշխանության կողքին, օգնել ենք շատ կարեւոր պահերի, եւ որեւէ մեկը չփորձի հերքել։ Մեր նպատակները լիովին այլ են, մենք այլ բան ենք սպասել։ Ի՞նչ լավ բան կա, ինչ էլ կա՝ փիառով ներկայացվում է ձեր աչքերին թոզ փչելու համար։ Ես ասում եմ որպես երկար ժամանակ պետական ապարատում աշխատած մարդ՝ ձեր աչքերին թոզ են փչում»,- նշեց նա։

Ստեփանյանը չի մանրամասնել՝ իշխանության որ արարքն է հիասթափեցրել իրեն։ Հիշեցնենք՝ նա պատերազմից հետո աշխատել է Ազգային ժողովում, ապա ԱԻՆ նախկին նախարար Արմեն Փամբուխյանի օգնականն է եղել։

Նշենք, որ խմբի գործունեությունը բավականին սկանդալային էր։ Նախքան պատերազմը նրանք տեսանյութ էին հրապարակել, որտեղ ստիպում էին Փաշինյանին վիրավորած տղամարդուն ներողություն խնդրել։ Այս առնչությամբ հարուցված քրեական գործը հետագայում կարճվեց։

«Սուրմալու»-ի պայթյունին հաջորդող օրերին տեսախցիկների առաջ փլատակների մեջ մաքուր հագուստով ու փայլող կոշիկներով լուսանկարվող Ստեփանյանը, այդ ժամանակ նախարար Արմեն Փամբուխչյանի, փոխնախարար Արտյուշ Գրիգորյանի հետ փրկարարների համար ջուր տանելու հորդոր հնչեցրած քաղաքացիներից մեկի հետ վիճաբանության մեջ էր մտել: