Ջամայկան 200 ուժայինների կուղարկի Հաիթի անվտանգության հարցում օգնելու համար

Ջամայկայի իշխանությունները որոշել են 200 իրավապահներից բաղկացած խումբ ուղարկել Հաիթի՝ երկրում անվտանգության հետ կապված խնդիրները լուծելու համար: Արմենպրես-ի փոխանցմամբ՝ այս մասին գրում է Gleaner տեղական թերթը։

Ինչպես նշում է հրատարակությունը, Ջամայկայի վարչապետ Էնդրյու Հոուլնեսը հույս է հայտնել, որ առաքելությունը կօգնի Հաիթիի բնակիչներին, որոնք գտնվում են առավել ծանր տնտեսական վիճակում, անհրաժեշտության դեպքում մարդասիրական օգնության հասանելիություն ստանալ:

Հուլիսի 29-ին Քենիայի արտաքին գործերի նախարար Ալֆրեդ Մութուան X-ում (նախկինում Twitter-ում) հայտնել է, որ «Հաիթիի բարեկամների խմբի» խնդրանքով համաձայնվել են քննարկել Հաիթիում բազմազգ ուժերի տեղակայման հարցը: Քենիան պարտավորվել է Հաիթի ուղարկել 1000 ոստիկանի՝ աջակցելու Հաիթիի ոստիկանության ուսուցմանը, երկրում բնականոն կյանքի վերականգնմանը և ռազմավարական օբյեկտների պաշտպանությանը: Նախարարը նշել է, որ խաղաղապահներին գործի կդնի ՄԱԿ-ի Անվտանգության խորհրդից մանդատ ստանալուց և Քենիայում սահմանադրական այլ գործընթացներ իրականացնելուց հետո:

Հաիթիում անվտանգության և հումանիտար իրավիճակը վատթարացել է 2021 թվականի հուլիսի 7-ի գիշերը երկրի նախագահ Ժովենել Մոիզի սպանությունից, ինչպես նաև նույն թվականի օգոստոսին տեղի ունեցած երկրաշարժից հետո, որի հետևանքով զոհվել է ավելի քան 2,2 հազար մարդ։ Կղզում զգալի ուժ են կազմում տարբեր զինված խմբավորումները։