Մեծ Բրիտանիան լրացուցիչ պատժամիջոցներ է կիրառել «Վագներ» ՊՄԿ-ի դեմ

Մեծ Բրիտանիան պատժամիջոցներ է սահմանել Մալիում, Կենտրոնական Աֆրիկյան Հանրապետությունում և Սուդանում ռուսական «Վագներ» ՊՄ-ի գործունեության հետ կապված 13 մարդկանց և ընկերությունների նկատմամբ, հայտնում է բրիտանական կառավարությունը։

Նրանց թվում են երեք մարդ, այդ թվում՝ Եվգենի Պրիգոժինի «աջ ձեռքը», որը ղեկավարում է Մալիում և Կենտրոնական Աֆրիկյան Հանրապետությունում ՊՄԿ-ի գործունեությունը, որոնք իրենց գործողությունների ընթացքում դիտավորյալ թիրախ են դարձրել խաղաղ բնակչությանը, ասվում է բրիտանական կառավարության հաղորդագրությունում, հայտնում է BBC-ն։ Սրանք են Մալիում «Վագներ» ՊՄԿ-ի ղեկավար Իվան Մասլովը և Կենտրոնական Աֆրիկյան Հանրապետությունում «Վագներ»-ի երկու առաջնորդներ Վիտալի Պերֆիլևը և Կոնստանտին Պիկալովը:

Եվս հինգ իրավաբանական և ֆիզիկական անձանց նկատմամբ պատժամիջոցներ են սահմանվել Սուդանում խաղաղությունն ու կայունությունը վտանգելու համար, այդ թվում՝ ռազմական տեխնիկա մատակարարելու և ապատեղեկատվական արշավների միջոցով:

«Վագներ» ՊՄԿ-ն արդեն մի քանի տարի գործում է Մալիում, Կենտրոնական Աֆրիկյան Հանրապետությունում և Սուդանում՝ ագրեսիվ կերպով առաջ մղելով Ռուսաստանի արտաքին քաղաքական շահերը տարածաշրջանում և ռազմական աջակցություն ցուցաբերելով հակաահաբեկչական գործողություններին, որոնց հետևանքով հարյուրավոր խաղաղ բնակիչներ են զոհվել, ասվում է հայտարարության մեջ։

Մեծ Բրիտանիան նախկինում պատժամիջոցներ է սահմանել «Վագներ» խմբի, նրա առաջնորդ Եվգենի Պրիգոժինի և նրա մի քանի գլխավոր հրամանատարների նկատմամբ, որոնք ներգրավված են Ուկրաինա Ռուսաստանի անօրինական ներխուժման մեջ: