Գտնվել է գլխուղեղի անևրիզմայի բուժման առաջին միջոցն առանց վիրահատության

Ճապոնական RIKEN ուղեղի հետազոտությունների կենտրոնի (CBS) գիտնականները հայտնաբերել են մի քանի մուտացիաներ, որոնք հանգեցնում են ներգանգային անևրիզմայի, ուղեղի արյունատար անոթների պատերի այտուցման, որոնք ցանկացած պահի կարող են պատռվել: Ըստ shantnews-ի՝ բացահայտումը գիտնականներին թույլ է տվել մշակել անևրիզմայի առաջին բժշկական բուժումը: Հետազոտությունը հրապարակվել է Science Translational Medicine ամսագրում:

Գիտնականները վերծանել են ԴՆԹ-ի հաջորդականությունը 65 անևրիզմայի և ուղեղի 24 նորմալ զարկերակների բջիջներում: Նրանք կենտրոնացել են ներգանգային սակուլյար անևրիզմաների վրա (ISA), որոնք կազմում են բոլոր անևրիզմների մոտ 90%-ը:

Տարիքը, հիպերտոնիան և ալկոհոլի օգտագործումը համարվում են անևրիզմայի հիմնական ռիսկի գործոնները: Սակայն հետազոտությունների արդյունքները ցույց են տվել, որ անևրիզմաների ավելի քան 90%-ում 16 գեների մուտացիա կա։ Սա նշանակում է, որ անևրիզմայի դեպքերի մեծ մասում հենց մուտացիաներն են հիմնական դրդապատճառը:

«Ներգանգային անևրիզմայի առաջին ոչ վիրահատական ​​կենդանական մոդելի ստեղծումն ինքնին ձեռքբերում է, բայց ավելի կարևոր է, որ մենք ճնշեցինք զարկերակների լայնացումը դեղորայքով, ինչը ցույց է տալիս, որ ներգանգային անևրիզմաները կարող են բուժվել բժշկական ճանապարհով», – գրում են գիտնականները:

Լրացուցիչ հետազոտություններ կպահանջվեն ցույց տալու համար, որ այս տեսակի դեղորայքային բուժումն արդյունավետ է մարդկանց համար: Այս դեպքում հիմնական դժվարությունը կայանում է չպատռված ներգանգային անևրիզմայի ախտորոշման մեջ. դրանք սովորաբար հայտնաբերվում են մագնիսական ռեզոնանսային անգիոգրաֆիայի կամ համակարգչային տոմոգրաֆիայի միջոցով բժշկական զննումների ժամանակ: Եթե ​​այս թեստերը մատչելի չեն, անևրիզմաները չեն կարող հայտնաբերվել մինչև պայթելը: Ճապոնիայում, որտեղ անցկացվել է այս հետազոտությունը, շատ մարդիկ կարող են այս թեստերն անցնել որպես իրենց տարեկան առողջության ստուգման մի մաս՝ հատկապես օգտակար դարձնելով դեղերի մշակումը: