Սերբիան դադարեցրել է զենքի արտահանումն իր անվտանգությունն ապահովելու համար

Սերբիայի իշխանությունները նախագահ Ալեքսանդր Վուչիչի հանձնարարականով ազգային անվտանգությունն ապահովելու համար որոշել են դադարեցնել զենքի և ռազմական տեխնիկայի արտահանումը։ Այս մասին ուրբաթ օրը Informer TV հեռուստաալիքի եթերում հայտարարել է հանրապետության պաշտպանության նախարար Միլոշ Վուչեւիչը։

«Սերբիան պետք է մշտապես հոգ տանի իր ինքնիշխանության, ամբողջականության և անկախ քաղաքականության մասին։ Սրանում ոչ մի նոր բան չկա, դա արձագանք է այն ամենին, ինչ տեղի է ունենում վերջին շրջանում աշխարհում և, առաջին հերթին, մեր տարածաշրջանում։ Այս առնչությամբ նախագահը, որպես գերագույն գլխավոր հրամանատար, սահմանադրությանը համապատասխան, առաջարկել է, իսկ ՊՆ-ն պատրաստել է ակտ, իսկ կառավարությունն այն ընդունել է երեկվա նիստում։ Որոշման համաձայն՝ առաջիկա 30 օրվա ընթացքում Սերբիայից սպառազինության և ռազմական տեխնիկայի արտահանում չի լինի»,- ընդգծել է պաշտպանության գերատեսչության ղեկավարը՝ հավելելով, որ արգելքը կարող է երկարաձգվել։

«Սերբիայի զինված ուժերը և պաշտպանության նախարարությունն այժմ ապահովման հարցում առաջնահերթություն ունեն։ Գործարաններում[զենքի] արտադրությունը չի դադարի»,- ասել է Վուչեւիչը։

Ալեքսանդր Վուչիչն ավելի վաղ ընդգծել էր, որ արգելքը հիմնավորված է նրանով, որ «Սերբիայի կենսական ազգային շահերը ներկայումս ծայրահեղ սպառնալիքի տակ են, և մենք պետք է պատրաստ լինենք ամեն ինչի մեր երկրի դեմ ագրեսիայի դեպքում»։

Սերբիայի ղեկավարը նաև խոստովանել է, որ սերբական զինամթերքն ու զենքը, չնայած երրորդ երկրներ փոխանցելու պայմանագրերում արգելքին, կարող են հայտնվել հակամարտության գոտի։ Բայց միևնույն ժամանակ նա ընդգծել է, որ «Սերբիան Ուկրաինային զենք չի մատակարարել և չի մատակարարի»։