Չնայած տարածաշրջանում խաղաղություն հաստատելու մեր ջանքերին՝ իրավիճակն այս պահին ճգնաժամային է․ Մհեր Գրիգորյան

Փոխվարչապետ Մհեր Գրիգորյանը մասնակցել է Ֆրանսիայի Հանրապետության Ազգային տոնի կապակցությամբ Ֆրանսիայի դեսպանությունում կազմակերպված հանդիսավոր միջոցառմանը: Այս մասին տեղեկացնում է փոխվարչապետի գրասենյակը։

Փոխվարչապետը հանդես է ելույթով եւ Կառավարության անունից շնորհավորել Ֆրանսիայի Ազգային տոնի կապակցությամբ՝ մաղթելով բարեկամ Ֆրանսիային եւ ֆրանսիացիներին բարօրություն, իսկ հայ-ֆրանսիական բարեկամությանը՝ հարատեւություն։

«1789 թվականի հուլիսի 14-ին ֆրանսիացիները, համախմբվելով ազատության, հավասարության եւ եղբայրության վեհ գաղափարների շուրջ՝ ժամանակակից աշխարհի համար ուրվագծեցին հիմնարար ազատությունների եւ ժողովրդավարության ուղին։

Ցանկանում եմ ընդգծել, որ համընդհանուր արժեքների վրա հիմնված Հայաստանի եւ Ֆրանսիայի միջեւ պատմական կապերն առանցքային նշանակություն են ունեցել մեր միջպետական առանձնաշնորհյալ հարաբերությունների զարգացման համար:

Դիվանագիտական հարաբերությունների հաստատումից ի վեր՝ երկու երկրներին հաջողվել է բարձրաստիճան քաղաքական սերտ երկխոսություն եւ արդյունավետ համագործակցություն ձեւավորել բոլոր բնագավառներում»,-նշել է փոխվարչապետ Մհեր Գրիգորյանը:

Իր խոսքում փոխվարչապետը նաեւ նշել է, որ հայ ժողովրդի պատմության մեջ իր ուրույն տեղն ունենալով` Ֆրանսիան նշանակալի դեր է ստանձնել հատկապես 20-րդ դարի սկզբին, երբ ցեղասպանությունից փրկված հազարավոր հայեր Ֆրանսիայի բարեկամական հողում ապաստան են գտել եւ արժանապատիվ կյանքի հնարավորություն ձեռք բերել:

«Բարձր ենք գնահատում բարեկամ՝ նախագահ Էմանուել Մակրոնի կարեւոր դերակատարությունը Հայաստան-Ադրբեջան հարաբերությունների կարգավորման ու Լեռնային Ղարաբաղի ժողովրդի իրավունքների եւ անվտանգության հասցեագրման գործում: Ցավով պետք է տեղեկացնեմ, որ չնայած տարածաշրջանում հարատեւ կայունություն եւ խաղաղություն հաստատելու մեր ջանքերին՝ իրավիճակն այս պահին ճգնաժամային է»,- նշել է Մհեր Գրիգորյանը:

Ամփոփելով իր խոսքը՝ փոխվարչապետը, օգտվելով առիթից, նաեւ շնորհակալություն է հայտնել Հայաստանում իր դիվանագիտական առաքելությունը ավարտող Ֆրանսիայի դեսպան Անն Լուոյին հայ-ֆրանսիական հարաբերությունների ընդլայնման ու խորացման ուղղությամբ ներդրած ջանքերի համար եւ մաղթել հաջողություններ՝ վստահեցնելով, որ նա միշտ կմնա հայերի բարեկամը: