Վերանայել թեստային համակարգն ու ընդունելության պահանջները

Արդեն ավարտվել են 2023-2024 ուստարվա բուհերի ընդունելության երկրորդ փուլի միասնական քննությունները: Հիշեցնենք, որ դիմորդներն արդեն հնարավորություն ունեն տարվա մեջ երկու անգամ բուհերի ընդունելության քննություններին մասնակցել․ մեկ անգամ՝ հունվարին, մեկ անգամ` ամռանը: Հունվարին ձախողված դիմորդները հնարավորություն ունեն մեկ անգամ էլ բախտը փորձել: Եթե հունվարին կայացած միասնական քննություններին հայտագրվել էր 6 հազար 856 դիմորդ, ապա հունիսին՝ 13 հազար 456: 

ԳԹԿ-ի փոխանցմամբ, հուլիսի 18-ին հրապարակվելու են մրցույթի արդյունքները․ ցուցակները կփակցվեն բուհերում, իսկ դիմորդները հաղորդագրություն կստանան անձնական էլհասցեներին։ Հուլիսի 19-ից մրցույթի լրացուցիչ փուլի հայտագրումն է՝ թափուր մնացած տեղերի համար, արդեն հանձնված քննություններից դրական միավորներով (7,5 եւ բարձր), որոնք, այնուամենայնիվ, չեն բավականացրել հիմնական մրցույթով բուհ ընդունվելու՝ նշված ՄԵԿ մասնագիտությամբ։ Այս անգամ դիմորդը կարող է հայտագրել մինչեւ 6 մասնագիտություն՝ իր հանձնած քննություններին համապատասխան։ Լրացուցիչ մրցույթի արդյունքները կհրապարակվեն հուլիսի 30-ին։     
Որոշ առարկաների մասով արդեն կատարվել է նախնական արդյունքների վերլուծություն: Գնահատման եւ թեստավորման կենտրոնի փոխանցմամբ՝ «Հայոց լեզու եւ հայ գրականություն» առարկայի միասնական քննության երկրորդ փուլի քննությանը մասնակցելու համար հայտագրվել է 4 հազար 349 դիմորդ, քննությանը մասնակցել է 4 հազար 193-ը: Միջին միավորը եղել է 12.23-ը: Դրական միավորի շեմը չի հաղթահարել 621 դիմորդ կամ մասնակիցների 14.8 տոկոսը: 18-20 միավոր հավաքել է 528 դիմորդ կամ մասնակիցների 12.6 տոկոսը: Այդ թվում՝ 18-18.75 միավոր հավաքել է 278 դիմորդ, 19-19.75 միավոր՝ 230 եւ 20 միավոր՝ 20 դիմորդ:

Նախորդ տարվա արդյունքների համեմատությամբ՝ 2022-ին դիմորդների թիվն ավելի շատ է եղել: Այսպես․ հիշյալ տարում քննությանը մասնակցել է 5 հազար 142 դիմորդ, միջին միավորը եղել է 11.96-ը: Թեեւ 2022թ. 7.5-ից ցածր միավոր հավաքել է 805 հոգի, իսկ 2023թ. առաջին փուլում՝ 458, երկրորդ փուլում՝ 621: 18-20 միավոր 2022թ. ստացել է 503 դիմորդ, 2023թ. առաջին փուլում՝ 108 եւ երկրորդ փուլում՝ 528 դիմորդ:

Ի դեպ, «Անգլերեն» առարկայից քննություն հանձնելու համար այս տարի հայտագրվել է 5 հազար 634 դիմորդ, քննությանը մասնակցել է 5 հազար 370-ը: Միջին միավորը եղել է 13.25-ը: Ավելի շատ, քան «Հայոց լեզու եւ հայ գրականություն» առարկայի դեպքում: Դրական միավորի շեմը չի հաղթահարել 643 հոգի կամ մասնակիցների 12 տոկոսը: 18-20 միավոր հավաքել է 878 հոգի կամ մասնակիցների 16.4 տոկոսը: Այդ թվում՝ 18-18.75 միավոր հավաքել է 621 դիմորդ, 19-19.75 միավոր՝ 252 եւ 20 միավոր՝ 5 դիմորդ: 7.5-ից ցածր միավոր ստացել է 643 հոգի կամ 32 տոկոսը (2022թ.՝ 535 կամ 9,7 տոկոս, 2023թ. առաջին փուլում` 485): 18-20 միավոր հավաքել է 878 դիմորդ կամ 16.4 տոկոսը (2022թ.՝ 1131 կամ 20,6 տոկոս, 2023թ. առաջին փուլում` 520 կամ 16.9 տոկոս):

Ընդհանուր առմամբ, հունիսին կայացած միասնական քննությունների երկրորդ փուլում 13 քննական առարկաներից անբավարար է ստացել 3 հազար 233 դիմորդ, իսկ 106 դիմորդ կարողացել է վաստակել 20 միավոր: Նշենք, որ միասնական քննությունների առաջին փուլում անբավարար էր ստացել 2 հազար 376 դիմորդ:  

Կրթության փորձագետ Վիկտոր Մարտիրոսյանից հետաքրքրվեցինք․ ինչո՞վ է պայմանավորված այն հանգամանքը, որ հայոց լեզվի միջին միավորը եղել է 12.23-ը, իսկ անգլերենի միջին միավորը` 13.25-ը, երբ օտար լեզվից ավելի բարձր են ստանում, քան մայրենի լեզվից: Ի դեպ, անգլերենից քննություն հանձնելու համար եւս շուրջ 1300 դիմորդ ավել է հայտագրվել, քան հայոց լեզվից եւ գրականությունից, ինչո՞վ է բացատրում նաեւ այս փաստը: 

«Անգլերենից համեմատաբար բարձր արդյունքներն ամենեւին չեն խոսում անգլերեն ավելի լավ իմանալու մասին, բարձր ստացած դիմորդների մեծ մասը բանավոր երկու նախադասություն ճիշտ չի արտաբերում, նույնը՝ նաեւ ընթերցանության պարագայում: Շան գլուխն այլ տեղ է թաղված, այն տանում է մինչեւ առաջին թեստերը կազմելու օրեր: Անգլերենով կային բազմաթիվ մակարդակների բազում թեստային փաթեթներ, եւ համեմատաբար հեշտ էր դրանք հայկական դպրոցի ծրագրերին համապատասխանեցնելը: Դրան զուգահեռ, կային նաեւ գործող գնահատման համակարգեր, այսինքն` հիմնական խնդիրը, այսպես կոչված, տեղայնացումն էր: Այլ էր խնդիրը հայոց լեզվի պարագայում. շարադրություն կամ թելադրություն ուսուցանող մասնագետները դարձան թեստեր կազմողներ: Թեստի հիմքում ընկան ոչ թե հարցն ու հարցի արդյունքում հետապնդվող գիտելիքն ու կարողությունը, այլ առարկայի ողջ բովանդակությունը, ավելին` երբ սովորողները բավականին բարձր արդյունքներ սկսեցին ցույց տալ, թեստերի հեղինակները չզլացան խրթին, երկակի պատասխաններ ենթադրող, երբեմն էլ հատուկ թակարդներ դնել թեստերում: Եթե սովորողների շրջանում հարցումներ կատարեք, կհամոզվեք, որ նրանք կդժգոհեն ե՛ւ ծավալից, ե՛ւ գնահատման օբյեկտիվությունից»,- ասում է կրթության փորձագետն ու մատնանշում եւս մեկ կարեւոր խնդիր, այս անգամ` հոգեբանական։  

«Կա եւս մեկ կարեւոր հոգեբանական խնդիր. առարկայի իմացությունը սովորողների մեծ մասը նույնացնում է այդ լեզվով պարզապես խոսելու հետ, եւ դիմորդներն ու նրանց ծնողները կարծում են, թե իրենց երեխան արդեն իսկ հայերեն գիտի, անհրաժեշտ է ավելին իմանալ, եւ այդ ավելին օտար լեզուն է»,- նշում է Վ. Մարտիրոսյանը, ում համոզմամբ` լուծումը կլինի այն ժամանակ, երբ ամբողջովին վերանայվեն թեստային համակարգն ու ընդունելության պահանջները:

Աղբյուրը՝ Հրապարակ։