Մասկը գլխավորել է մոլորակի հինգ հարյուր ամենահարուստ մարդկանց վարկանիշը

Ամերիկացի միլիարդատեր և ձեռնարկատեր Իլոն Մասկը՝ 234 միլիարդ դոլար կարողությամբ գլխավորել է մոլորակի հինգ հարյուր ամենահարուստ մարդկանց վարկանիշը՝ ըստ Bloomberg Billionaires Index-ի։ Այս մասին հայտնում է news.am-ը։

Երկուշաբթի օրը հրապարակված վիճակագրության համաձայն՝ Մասկի կարողությունը 2023 թվականի առաջին կիսամյակում կտրուկ աճել է 96,6 միլիարդ դոլարով: Վարկանիշի երկրորդ տեղում է ֆրանսիական LVMH (LVMH Moet Hennessy - Louis Vuitton) շքեղ ապրանքներ արտադրող ընկերության սեփականատեր Բեռնար Առնոն, ում կարողության մակարդակը գնահատվել է 200 միլիարդ դոլար: Առաջին կիսամյակի աճը կազմել է 38,2 մլրդ դոլար։

Աշխարհի 500 ամենահարուստ մարդիկ միասին առաջին կիսամյակում 852 միլիարդ դոլարով ավելացրել են իրենց կարողությունը։ «Bloomberg Billionaires Index-ի անդամներից յուրաքանչյուրը վերջին վեց ամսվա ընթացքում վաստակել է օրական միջինը 14 միլիոն դոլար»,- ասվում է վարկանիշի մեկնաբանության մեջ։ Միաժամանակ, կարողության աճով վարկանիշը գլխավորել են Մասկը, Meta-ի հիմնադիր Մարկ Ցուկերբերգը (58,9 մլրդ դոլար աճ) և Amazon-ի հիմնադիր Ջեֆ Բեզոսը (47,4 մլրդ դոլար):