Մեծ Բրիտանիայի Օրկնեյան կղզիները կարող են մտնել Նորվեգիայի կազմի մեջ

Օրկնեյան կղզիները հնարավոր է փոխեն Մեծ Բրիտանիայում իրենց կարգավիճակը կամ անգամ դառնան Նորվեգիայի ինքնակառավարվող տարածք՝ համաձայն նոր առաջարկների, տեղեկացնում news.am կայքից։

Հաջորդ շաբաթ Օրկնեյան կղզիների խորհրդի քննարկմանն է ներկայացվելու «կառավարման այլընտրանքային ձևերի» քննարկման մասին միջնորդությունը։

Խորհրդի ղեկավար Ջեյմս Սթոքանը հայտարարել է, որ Օրկնեյան կղզիները Մեծ Բրիտանիայի ներսում իրենց ներկայիս հարաբերությունների պարագայում արդարացի ֆինանսավորում չեն ստանում։

Նա ուզում է դիտարկել թագավորության անկախ տարածքները, ինչպիսիք են Նորմանդյան կղզիները և անդրծովյան տարածքները, ինչպիսիք են Ֆոլկլենդյան կղզիները։

Նա ենթադրել է, որ մյուս հնարավոր ապագան կարող է նման լինել Ֆարերյան կղզիներին, որոնք Դանիայի ինքնակառավարվող տարածք են։

Սթոքանը կոչ է անում խորհրդի անդամներին պաշտպանել իր գաղափարը․ նոր միջոցներ գտնել Օրկնեյան կղզիների համար մեծ ֆինանսական անվտանգություն և նրա բնակիչների համար տնտեսական հնարավորություններ ապահովելու նպատակով։

2017 թ․ Օրկնեյան կղզիների խորհուրդը քվեարկել էր մեծ ինքնավարություն ստանալու հարցը քննարկելու օգտին։ Թեև նրանք ցանկացել էին «ավելի ուժեղ ձայն» ունենալ, սակայն Օրկնեյան կղզիների լիակատար անկախությունը պաշտպանության չէր արժանացել։

Ավելի վաղ Օրկնեյան կղզիները գտնվել են Նորվեգիայի և Դանիայի հսկողության տակ, մինչև որ 1472թ․ դարձան Շոտլանդիայի մասը։

Կղզիներն օգտագործվել են որպես երաշխիք Մարգրետ Դանիացու՝ Շոտլանդիայի թագավոր Հակոբ 3-րդի ապագա կնոջ, հարսանեկան օժիտի համար։