Ձվից ալերգիան ու դրանից բխող բարդությունները՝ երեխաների մոտ

Հավկիթից ալերգիան երեխաների շրջանում գրանցվող ալերգիաների ամենատարածված տեսակն է:

Այն սովորաբար ի հայտ է գալիս երեխայի փոքր տարիքում։ Բարեբախտաբար, երեխաների մեծ մասը հաղթարում է ալերգիայի այս տեսակը մինչև դպրոցական տարիքին հասնելը: Այնուամենայնիվ, քանի դեռ երեխայի մոտ ձվից կամ ձու պարունակող սննդատեսակներից առաջանում են ալերգիայի ախտանիշներ, պետք է նրա սննակարգից բացառել դրանք:

Տիպիկ դեպքերում ալերգիկ ռեակցիաների պատճառ է դառնում ձվի սպիտակուցը, սակայն ձվի դեղնուցը նույնպես կարող է հանդես գալ որպես ալերգեն, փոխանցում է Aysor.am-ը:

Հավանական է նաև, որ հում, քիչ խաշած կամ թվածքներում առկա քիչ քանակությամբ ձուն առաջացնի ալերգիկ ռեակցիա:

Նորածնի արդեն 6 ամսական տարիքում, եթե շարունակվում է կրծքի կաթով կերակրումը, պետք է սկսել տարբեր տեսակի մթերքների, այդ թվում՝ եփած ձվի փորձարկումը: Շատ կարևոր է, որ երեխային տրվի եփած ձու, քանի որ հում ձուն կարող է պարունակել բակտերիաներ:

Ինչպես բոլոր նոր սննդամթերքների, այնպես էլ ձվի դեպքում ավելի լավ է եփած ձուն փորձել առանց որևէ այլ սննդամթերքի կամ, ծայրահեղ դեպքում, երեխային արդեն հայտնի սննդատեսակների հետ: Նման դեպքում կարելի է հեշտությամբ արձանագրել որևէ կողմնակի ռեակցիա, որը կարող է վկայել ալերգիկայի մասին։

Ձվից ալերգիայի նշանները սովորաբար սկսվում են ձու կամ ձու պարունակող մթերք ընդունելուց րոպեներ հետո: Երբեմն ալերգիայի նշանները կարող են հետաձգվել մինչև մի քանի ժամ:

Թեթև ախտանիշներից են՝

եղնջացան,

դեմքի, շրթունքների կամ կոպերի այտուցվածություն,

քթի փակվածություն, քթահոսություն կամ փռշտոց,

բերանում ծակծկոցներ,

մարսողական խնդիրներ՝ որովայնային կծկանքներ, սրտխառնոց կամ փսխում:

Ավելի ծանր դեպքերում կարող են զարգանալ ասթմայի նոպա հիշեցնող անաֆիլաքսիայի նշաններ, այդ թվում՝

դժվարացած շնչառություն կամ սուր շնչարգելություն և հևոց,

լեզվի կամ ըմպան-կոկորդի այտուց,

ձայնի խռպոտում կամ խոսքի դժվարացում,

շնչելիս խզզոցներ կամ կայուն հազ,

մաշկային ծածկույթների գունատություն և կպչուն քրտինք,

գլխապտույտ կամ արյան ճնշման կտրուկ անկում:

Կարևոր է իմանալ, որ սննդամթերքի պիտակում որպես բաղադրիչ կարող է ոչ թե ուղղակիորեն նշված լինել ձու, այլ դրանում պարունակվող սպիտակուցները, օրինակ՝ ալբումին, գլոբուլին, լեյցիտին, լիվետին, լիզոզիմ, վիտելին, «օվա» կամ «օվո» նախածանցներով սկսվող բառեր (օրինակ՝ օվալբումին, օվոգլոբուլին). Զգուշացեք նաև այս բաղադրիչներից: