Ադրբեջանի պաշտպանության նախարարը սպառնում է Լեռնային Ղարաբաղին

Ադրբեջանի պաշտպանության նախարար Զաքիր Հասանովը սպառնալիքներ է հնչեցրել Լեռնային Ղարաբաղի հասցեին։

«Ինտերֆաքսի» փոխանցմամբ՝ ադրբեջանցի նախարարը հայտարարել է հետեւյալը.

«Ղարաբաղի տնտեսական շրջանում մնացած անօրինական հայկական զինված կազմավորումները (ԱԶԳ) լուրջ վտանգ չեն ներկայացնում Ադրբեջանի համար, ադրբեջանական բանակի մեկ կորպուսը կարող է դիմակայել դրանց։ Մենք բարձր չենք գնահատում այդ անօրինական զինված կազմավորումների հնարավորությունները, որոնք մնացել են Ադրբեջանի ղարաբաղյան տնտեսական գոտու տարածքում։ Մենք գիտենք նրանց թիվը, սպառազինությունը, գիտենք նրանց բարոյահոգեբանական վիճակը, գիտենք, թե ինչի են նրանք ընդունակ։

Վստահեցնում եմ ձեզ, ինչպես նշել է պարոն նախագահը (Ադրբեջան), նրանք բացարձակապես հնարավորություն չունեն ադրբեջանական բանակի դեմ որեւէ գործողություն իրականացնելու», - ադրբեջանական CBC հեռուստաալիքին տված հարցազրույցում ասել է նախարարը։

Նախարարը նշել է, որ «Ղարաբաղում հայկական անօրինական զինված խմբավորումներն ունակ են միայն որոշ մանր սադրանքների, որոնք իրենց համար «շատ վատ» ավարտ կունենան։ «Սակայն, եթե նրանք գնան սադրանքների, որոշեն ինչ-որ անօրինական գործողություններ իրականացնել Ադրբեջանի ԶՈւ դեմ, ապա ադրբեջանական բանակի մեկ կորպուսը, նույնիսկ ոչ ամբողջական, կարող է դիմակայել այդ անօրինական զինված կազմավորումներին։

Մենք գիտենք եւ գիտենք, որ ուժերի և միջոցների հարաբերակցությունը (Ադրբեջանի զինված ուժեր եւ անօրինական զինված կազմավորումներ) նրանց օգտին չէ։ Այսպիսով, ստորաբաժանումներից մեկը կարող է զինաթափել այդ ապօրինի զինված կազմավորումները»։

Նախարարը նշել է, որ հետախուզական մեծ հնարավորությունների շնորհիվ Ադրբեջանն ունի ամբողջական տեղեկատվություն ապօրինի զինված կազմավորումների մասին. «Մենք գիտենք նրանց սպառազինությունը՝ մի քանի տասնյակ տանկեր, որոնք պահանջում են տեխնիկական վերանորոգում եւ սպասարկում, մի քանի տասնյակ թնդանոթներ, որոնք նույնպես խնդիրներ ունեն։

Միանշանակ կարող եմ ասել, որ այդ «ստորաբաժանումները» Ադրբեջանի համար ոչ մի վտանգ չեն ներկայացնում, նրանց բոլոր հնարավորությունները մանր սադրանքներ են, որոնք նրանք հնարավոր է ծրագրում են։ Սակայն ես զգուշացնում եմ, որ այդ դեպքում Ադրբեջանի ԶՈՒ ստորաբաժանումները կօգտագործվեն իրենց դեմ՝ համաձայն Ադրբեջանի օրենքների, ինչը նրանց կստիպի կատարել բոլոր պահանջները»,- ասել է նախարարը։

Միաժամանակ նախարարը նշել է, որ «ակնկալում է , որ այդ կազմավորումները կգիտակցեն, որ նրանք «այլ տարբերակներ չունեն, պետք է գործեն միջազգային օրենքների եւ Ադրբեջանի տարածքային ամբողջականության շրջանակներում»։

«Այսինքն՝ ճանաչել ադրբեջանական օրենքները, եւ թե ով է ուզում օրինական կարգով ապրել Ադրբեջանի տարածքում, խնդրեմ, թող ապրի, ով չի ուզում՝ ճանապարհը բաց է, կարող են գնալ ու ապրել այնտեղ, որտեղ ուզում են», - ընդգծել է Հասանովը։