Եթե Ադրբեջանը պատրաստ է ինքնախաբեությամբ զբաղվել, Հայաստանը պատրաստ չէ. Ալեն Սիմոնյան

Այդ հայտարարությունը հենց Ադրբեջանին է վնաս տալիս, որովհետեւ նման իրողությունների դեպքում իրենք այն հարցը, որ տասնամյակների ընթացքում հակամարտության պատճառ էր դարձել, չեն լուծել: Այս մասին այսօր՝ հունիսի 26-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը՝ անդրադառնալով Ադրբեջանի ԱԳ նախարար Բայրամովի հայտարարությանը, թե ԼՂ հայերին լրացուցիչ անվտանգության միջոցներ չեն տրամադրելու, առավելագույնը կարող են շարունակել իրենց լեզվով խոսել:

«Դա իրականությունից փախչել է, դա հարցի լուծում չի լինելու եւ իրենց ձեռք չի տալիս, որ այդ հարցերը չքննարկվի: Վստահ եմ, ինչ-որ փուլում իրենք դրան կգան: Նույնիսկ հիմա, կարծում եմ՝ դա բանակցություններից առաջ բարձր սանդղակ դնելու եւ դրանից հետո որպես բանակցային սկզբնական փուլ... այդ քայլերի համար է արվում»,-ասաց նա:

Հարցին, թե Բաքուն ի վերջա համաձայնելո՞ւ է Բաքու-Ստեփանակերտ միջազգային մեխանիզմի ներդրմանը, Ալեն Սիմոնյանը պատասխանեց. «Մեզ համար հայության իրավունքների պաշտպանությունը կարեւորագույն հարց է: Այդ հարցը չի կարող ուղղակի մոռացության մատնվել, դա ինքնախաբեություն է: Եթե Ադրբեջանը պատրաստ է ինքնախաբեությամբ զբաղվել, Հայաստանը պատրաստ չէ, մենք հետամուտ ենք լինելու մեր հայտարարություններին»,- նշեց նա։

«Ես չգիտեմ՝ խաղաղության պայմանագրի մեջ այդ մասը կներառվի, թե չի նեարռվե, թե դա առանձին փաստաթուղթ կլինի, որովհետեւ կոնկրետ երաշխիքներ են պետք: Մենք ունենք օրինակ, որ նոյեմբերի 9-ի հայտարարության պայմանները չեն պահպանվում: Եթե այդ հարցը չքննարկվեց, եթե այդ հարցի լուծումը չեղավ, նշանակում է, առնվազն այդ բանակցությունների մեծ մասը անիմաստ են»,-ասաց նա: