Դուք գիտեք՝ նա ուր է ուզում գնալ․ Գվարդիոլան՝ Մբապեի տեղափոխման մասին

Պեպ Գվարդիոլան նշել է, որ «Մանչեսթեր Սիթին» չի պատրաստվում ձեռք բերել «Պարի Սեն Ժերմենի» հարձակվող Կիլիան Մբապեին: Այս մասին գրել է Yahoo Sport-ը։

«Դուք գիտեք՝ նա ուր է ուզում գնալ»,- ասել է «Սիթիի» մարզիչը երկուշաբթի օրն Իսպանիայում գոլֆի մրցաշարի ժամանակ՝ ակնարկելով իսպանական «Ռեալին»:

Գվարդիոլան, խոսելով իր հայրենի Կատալոնիայի Էմպորդայում կայացած Legends Trophy մրցաշարում, նաև ասել է, որ «Սիթին» պայքարում է նախկինում իր գլխավորած «Բարսելոնայի» հետ կիսապաշտպան Իլկայ Գյունդողանի համար:

Գերմանացի կիսապաշտպանի պայմանագիրն ավարտվել է «Սիթիի» հետ, և Գվարդիոլան ցանկանում է, որ նա մնա, բայց «Բարսելոնան» փորձում է նրան տանել Լա Լիգա:

«Ես գիտեմ, որ «Բարսելոնան» հետաքրքրված է, և «Սիթին»՝ նույնպես»,- ասել է Գվարդիոլան։