ՌԴ ԱԳՆ-ն խստորեն դատապարտել է Մոսկվայի վրա ԱԹՍ-ներով հարձակումը, Կիևը հերքել է իր առնչությունը հարձակմանը

ՌԴ արտաքին գործերի նախարարությունը հայտարարել է, որ խստորեն դատապարտում է մայիսի 30-ի վաղ առավոտյան Մոսկվայում և Մոսկվայի մարզում «Ուկրաինայի զինված ուժերի կողմից իրականացված ահաբեկչական հարձակումների փորձերը»։ «Արմենպրես»-ի փոխանցմամբ՝ այս մասին հայտարարություն է տարածել Ռուսաստանի արտաքին քաղաքական գերատեսչությունը:

«Նման հարձակումները թեև ռազմական տեսանկյունից անիմաստ են, բայց, կարծես, ուղղված են բացառապես քաղաքացիական անձանց դեմ՝ նպատակ ունենալով խուճապ տարածել խաղաղ բնակչության շրջանում», - նշվում է հայտարարությունում։

ՌԴ ԱԳՆ-ում հավելել են, որ «Կիևի վարչակարգին Արևմուտքի աջակցությունը մղում է Ուկրաինայի ղեկավարությանը ավելի անխոհեմ հանցավոր գործողությունների»:

«ՆԱՏՕ-ի պաշտոնյաների հավաստիացումները, որ Կիևի վարչակարգը հարվածներ չի հասցնի Ռուսաստանի տարածքի խորքերին, ինչպես պարզվում է, ամբողջովին կեղծ են։ Ռուսական կողմն իրեն իրավունք է վերապահում ամենախիստ միջոցներ ձեռնարկել՝ ի պատասխան Կիևի վարչակարգի ահաբեկչական հարձակումների», - եզրափակել են ՌԴ ԱԳՆ-ում։

Ըստ France24-ի՝ Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտարարել է, որ Կիևն ուղղակիորեն ոչ մի կապ չունի ԱԹՍ-ներով հարձակման հետ, սակայն «բավարարված է՝ տեսնելով այդ հարձակումները և կանխատեսելով դրանց թվի ավելացումը»:

ՌԴ պաշտպանության նախարարության տվյալներով՝ հարձակումներն իրականացվել են ինքնաթիռի տիպի 8 անօդաչու թռչող սարքերի միջոցով։ Դրանցից 3-ը ոչնչացվել են ռադիոէլեկտրոնային պայքարի միջոցներով, կորցրել են վերահսկողությունը և շեղվել նախանշված թիրախներից, իսկ 5-ը խոցվել են «Պանցիր-Ս» զենիթային հրթիռահրանոթային համալիրով:

Հիշեցնենք՝ միջադեպի հետևանքով տուժածներ չկան: ԱԹՍ-ների ընկնելու հետևանքով թեթև վնասվել են մի քանի շենքեր:

Այս փաստի առթիվ ՌԴ Քննչական կոմիտեն քրեական գործ է հարուցել։