Հունաստանում մեկնարկել են խորհրդարանական ընտրությունները

Հունաստանում մեկնարկել են խորհրդարանական ընտրությունները, որոնք առաջինն են այն բանից հետո,երբ երկրի տնտեսությունն ազատվեց միջազգային վարկատուների խիստ վերահսկողությունից, որոնք երկիրը փրկելու համար միջոցներ էին տրամադրում գրեթե տասնամյա ֆինանսական ճգնաժամի ընթացքում:

Այս մասին, news.am-ի փոխանցմամբ, տեղեկացնում է The Associated Press-ը։

Կիրակնօրյա քվեարկության երկու գլխավոր հավակնորդներն են․ երկրի 55-ամյա պահպանողական վարչապետ Կիրիակոս Միցոտակիսը՝ Հարվարդյան կրթությամբ նախկին բանկային ծառայողը, և 48-ամյա Ալեքսիս Ցիպրասը, որը գլխավորում է «Սիրիզա» ձախ կուսակցությունը և վարչապետ է եղել ֆինանսական ճգնաժամի ամենաանհանգիստ տարիներին։

Թեև Միցոտակիսը կայուն առաջատար է հասարակական կարծիքի հարցումներում, սակայն վերջերս ներդրված համամասնական ներկայացուցչության ընտրական համակարգը քիչ հավանական է դարձնում նրա կուսակցության կողմից 300 անդամ ունեցող Հունաստանի խորհրդարանում բավարար քանակությամբ տեղեր ստանալը։ Կառավարություն ձևավորելու համար կոալիցիայի գործընկերների կարիք կլինի։

Կիրակնօրյա ընտրությունների հաղթողը կոալիցիա կազմելու համար երեք օր կունենա մեկ կամ մի քանի կուսակցությունների հետ բանակցելու համար։ Եթե դա չհաջողվի, կառավարություն ձևավորելու մանդատը կտրվի երկրորդ կուսակցությանը։ Սակայն երկու հիմնական և չորս ավելի փոքր կուսակցությունների միջև, որոնք ենթադրվում են կմտնեն խորհրդարան, առկա խորը տարաձայնությունները նշանակում են, որ կոալիցիա ստեղծելը բարդ կլինի, ինչը հավանական է դարձնում կրկնակի ընտրությունները հուլիսի 2-ին։

Երկրորդ ընտրությունները կանցկացվեն համաձայն ընտրությունների մասին նոր օրենքի, որը կթեթևացնի հաղթող կուսակցության կողմից կառավարության ձևավորումը՝ նրան խորհրդարանի 50 տեղի բոսնուս տրամադրելով։

Ընդհանուր առմամբ 32 կուսակցություն է պայքարում ընտրողների ձայների համար, թեև հասարակական կարծիքի հարցումները ցույց են տվել, որ միայն վեցն իրական հնարավորություն ունեն հաղթահարելու խորհրդարանում տեղ ստանալու 3 %-անոց շեմը։