«Զարմանալի է, որ այդ ժամին Աշոտիկը հայտնվեց այդ տարածքում, խիստ կասկածներ ունեմ, որ սա նույնպես սարքած է». զոհվածի մայր

44-օրյա պատերազմում զոհված զինծառայողի մայր Գայանե Եղիազարյանը կարծում է, որ Աշոտ Փաշինյանի մասնակցությամբ այս միջադեպը կազմակերպված է եւ նպատակ ուներ որոշակի կերպով ճնշել պայքարող ծնողներին:

«Ցավում եմ, որ ապրում ենք այս հասարակարգով, այս արժեքներով պետության մեջ: Մեր երեխեքն իրենց կյանքը տվեցին, որ մեր պետությունը ավելի ամուր ու կանգուն լինի, բայց այսօր տեսնում ենք, որ նույնիսկ զոհվածի ծնողին տարրական հարգանք չկա, բացակայում է: 

Սա էլ որերոդ անգամ նույն այդ պատմությունն է, որ պայքարող ակտիվիստ ծնողներին, որոնց ուզածը արդարությունն է, այդ ծնողների հանդեպ որոշակի գործողություններ են անում, ոնց որ սեպտեմբերի 21-ին, այնպես էլ այսօր: Այսօրվա միջադեպը շատ զարմանալի է, որ այդ ժամին Աշոտիկը հայտնվեց այդ տարածքում, ես արդեն խիստ կասկածներ ունեմ, որ սա նույնպես սարքած է, իրավունք ունենք ենթադրելու, որ սադրանք է սա»,- լրագրողների հետ զրույցում ասաց նա:

Գայանե Եղիազարյանը պատմեց, որ իրենք մոտեցել են Աշոտ Փաշինյանին, ասել են, որ ցանկանում են խոսել նրա հետ. «Ինքը ընդունել է, որ իրա պապան, մանան մեղավոր են, ինքը ներողություն է խնդրել նրանց փոխարեն, ասել է, որ նրանց հետ կապ չունի, չի կարող պատասխան տալ նրա փոխարեն: Մենք իրավունք ունենք իրենից պատասխան պահանջել իր հոր արածների համար, ինքը տենց կռված տղա է, չեմ կարծում, որ մի կնոջից վախենար: Մենք խելքներս չենք գցել, տեռորիստ չենք, ժողովուրդ, մենք ուզում ենք, որ մեղավորները պատասխան տան»:

Զոհվածի մայրը նշում է, որ իրենք ունեն բոլոր հիմքերը ենթադրելու, որ Աշոտ Փաշինյանը դիտավորյալ էր եկել դատարանի տարածք:

Ավելի վաղ փաստաբան Ռուբեն Մելիքյանը NEWS.am-ին հայտնել էր, որ 44-օրյա պատերազմում զոհված զինծառայողների ծնողները ձերբակալվել են վարչապետ Նիկոլ Փաշինյանի որդու՝ Աշոտ Փաշինյանին առեւանգելու ենթադրյալ փորձի հիմքով։ Նրանք տեղափոխվել են Շենգավիթի ոստիկանական բաժանմունք։

Իր հերթին ՔԿ-ից հայտնել են, որ Աշոտ Փաշինյանի կողմից ՀՀ ոստիկանությունում ներկայացված հաղորդումը քիչ առաջ փոխանցվել է ՀՀ քննչական կոմիտեին։ Դրա հիման վրա ՀՀ ՔԿ Երևան քաղաքի քննչական վարչության ծանր հանցագործությունների քննության բաժնում նախաձեռնվել է քրեական վարույթ՝ ՀՀ քրեական օրենսգրքի 191-րդ հոդվածի 2-րդ մասի 1-ին կետի հատկանիշներով։

Իրականացվում են անհետաձգելի քննչական գործողություններ՝ հանգամանքները պարզելու ուղղությամբ։

Հիշեցնենք՝ այսօր Փաշինյանի ընտանիքին պատկանող «Հայկական ժամանակ»-ը հայտնել է, որ զոհվածների ծնողները փորձել են առևանգել Աշոտ Փաշինյանին։

«Որդիների կանչ» ՀԿ-ն մանրամասներ է հայտնել միջադեպի մասին, ըստ որի. «Պետք է պարզաբանենք և հստակեցնենք մեկ բան, որ նշված երիտասարդը իր ոտքով-ձեռքով է նստել մեր հերոսամայրերից մեկի մեքենան, այնուհետև մեզ համար անհասկանալի պատճառով իրեն նետել մեքենայից»։

Այս պահին ծնողները ձերբակալվել են ու տարվել Շենգավիթի քննչական բաժին։