Հանցագործության համար մեղադրվողը պնդում է՝ առաջարկել են քրգործը կարճել, եթե մեկնի վարժական հավաքների, իշխանությունները հերքում են․ «Ազատություն»

Հանցագործության համար մեղադրվող երիտասարդը «Ազատությանը» պատմել է՝ իրեն զինկոմիսարիատից զանգել առաջարկել են, թե քրեական պատասխանատվությունից կազատվի, եթե մեկնի վարժական հավաքների։

Երիտասարդը, որ հրաժարվել է ներկայանալ, պնդել է, որ զինկոմիսարիատից կանչել են՝ տեղում հարցը քննարկելու։ Իշխանությունները կտրականապես հերքում են այս պնդումները։

«Առաջարկ է հնչել, որ մոտենամ խոսեմ գլխավորներից մեկի հետ ու, ըստ առաջարկի, իմ կամքով մեկնեմ զորահավաքների՝ էն պարագայում, երբ ես քրեական գործով անցնող անձ եմ։ Առաջարկը հենց դրա համար էր, որ քրեական գործը կարճվեր», - պատմել է երիտասարդը։

Նա, սակայն, մերժել է առաջարկն ու այս մասին տեղեկացրել իր փաստաբանին։

«Խարդախելու իմաստն է, որպեսզի անձին, որը վարժական հավաքներին ենթակա չի, հավաքագրեն և տանեն», - ասել է փաստաբան Արսեն Մկրտչյանն է, ով արդեն նման երկու դեպքի է առնչվել․ մի դեպքում պաշտպանյալն արդեն մեկնել է հավաքների, բայց մեղադրանքը չեն հանել։

«Անձին համոզել են, ասել են՝ «մենք Ձեզ կօգնենք, որպեսզի քրեական գործերդ բարենպաստ լուծումներ ստանան, և մարդը, գյուղաբնակ լինելով, համոզվել է, որ «փաստաբան ջան, գնամ մասնակցեմ, ինչ է եղել, հո վնաս չեն տա»», - պատմել է Արսեն Մկրտչյանը։

Երկրորդ պաշտպանյալը, սակայն, հրաժարվել է և զինկոմիսարիատի աշխատակից ներկայացած անձի հորդորներին ի պատասխան հակադարձել՝ «փաստաբանս ասում է՝ նման բան չի կարող լինել»։

«Ասում են՝ «քո փաստաբանը ինչ է հասկանում, մենք ավելի լավ ենք հասկանում», - պատմել է Մկրտչյանը։

Փաստաբանի կարծիքով՝ զինկոմիսարիատներն այս քայլին են գնում ռեսուրսների պակասի պատճառով. - «Այսինքն՝ հիմնականում հայտնի ուժերի զավակներն են, փեսաներն են, հորեղբոր տղաները, բարեկամներն են, որտեղի՞ց պետք է համալրվի այդ զանգվածը՝ կամ ընդդիմադիր դասից, կամ խեղճ ու կրակ էն մարդիկ, որոնք հանիրավի քրեական հետապնդումների տակ են գտնվում»:

Մինչդեռ խորհրդարանի Պաշտպանության հանձնաժողովի նախագահ Անդրանիկ Քոչարյանը կտրականապես հերքում է այս պնդումները։

«Ստում են, որ ասում են էդպիսի բան», - ասել է Քոչարյանը։

Իշխանական պատգամավորի խոսքով՝ այս մեխանիզմը ռուս-ուկրաինական պատերազմում է կիրառվում, բայց ոչ Հայաստանում։

«Ով որ էդպիսի բան է ասում, ինքը խառնում է երևի․ ռուս-ուկրաինական պատերազմում էդպիսի ուժեր օգտագործում են, էդպիսի մեխանիզմներ կան, Հայաստանում էդպիսի մեխանիզմներ չկան և չեն էլ կարող լինել», - ասել է Քոչարյանը։

Ավելի մանրամասն՝ սկզբնաղբյուր կայքում։