Ոտքի կկանգնենք և միասնաբար կհաղթենք այս ընտրություններում. Քըլըչդարօղլու

Թուրքիայի ընդդիմադիր «Ազգ» դաշինքի կողմից առաջադրված նախագահի թեկնածու, «Ժողովրդահանրապետական կուսակցության» (ԺՀԿ-CHP) առաջնորդ Քեմալ Քըլըչդարօղլուն Twitter-ում գրառում է արել՝ դիմելով ժողովրդին։ Այս մասին հայտնում է Ermenihaber-ը։

«Սիրելի ժողովուրդ, երեկվանից անդադար աշխատում ենք։ Հուսահատության մեջ չընկնեք։ Ես անսասան եմ մնալու։ Ձեզ ասելու եմ այն ամենի մասին, ինչ կատարվել է։

Այնուհետև ոտքի կկանգնենք և միասնաբար կհաղթենք այս ընտրություններում։ Ամենավերջում լինելու է այնպես, ինչպես կասի մեր ազգը»,–գրել է ընդդիմադիր թեկնածուն։

Հիշեցնենք, որ Թուրքիայում մայիսի 14-ի համապետական ընտրության արդյունքներով նախագահի թեկնածուներից ո՛չ Քեմալ Քըլըչդարօղլուին, ո՛չ էլ Ռեջեփ Թայիփ Էրդողանին չի հաջողվել ստանալ 50%+1 քվե, ինչի արդյունքում նախագահական ընտրությունները տեղափոխվել են 2-րդ փուլ, որը կլինի մայիսի 28-ին։