Արևային ակնոցների կարևորությունը. ինչին ուշադրություն դարձնել` գնելիս. ակնաբույժի խորհուրդները

Արևի ուլտրամանուշակագույն ճառագայթները (ՈՒՃ) վնասակար են աչքի համար և կարող են առաջացնել տեսողության հետ կապված բազմաթիվ խնդիրներ, այդ թվում՝ կատարակտ, դեղին բծի դեգեներացում, ֆոտոկերատիտ, պինգվեկուլ և աչքի պտերգիում։ Այս ամենը կարող է հանգեցնել մինչև անգամ տեսողության ժամանակավոր կորստի։

Aysor.am-ի հետ զրույցում ակնաբույժ Գոհար Բիշարյանն անդրադարձել է ակնոցների ընտրությանը և կարևորությանը.

«Արևի ճառագայթներն ուղիղ ընկնում են մեզ վրա, մեզ մոտ շատ բարձր է ՈՒՃ-ի դոզավորումը, ուստի շատ է կարևորվում ակնոցների կրումը: Ամենափոքր տարիքից երեխաներին պետք է սովորեցնել ակնոց կրել: Իրականում արևային ակնոցի ամենակարևոր բաղադրիչը, որին պետք է ուշադրություն դարձնել, UV-ն է՝ ուլտրամանուշակագույն ֆիլտրը: Որքան բարձր է UV ցուցանիշը, այնքան այն լավ է պաշտպանում: Մուգ ակնոց կրող մարդու աչքն ավելի քիչ լույս է ստանում, ինչի պատճառով բիբը լայնանում է, և եթե չկա ուլտրամանուշակագույն ճառագայթներից և «կապույտ լույս»-ից պաշտպանող շերտ, այն ավելի շատ ճառագայթներ է կլանում, քան եթե լիներ առանց ակնոցի»,- ասել է ակնաբույժը։

Երկրորդ բանը, որին պետք է ուշադրություն դարձնել ակնոց գնելիս, ըստ Գոհար Բիշարյանի, ակնոցի հումքն է․ թե ինչից է այն պատրաստված։

«Հիմա ամեն քայլափոխի արևային ակնոցներ են վաճառվում՝ 1 000 դրամից սկսած, ինչը ենթադրում է, որ տվյալ ակնոցի պատրաստումը չնչին կոպեկներ է արժեցել: Շատ հաճախ նմանատիպ էժանագին ակնոցներ կրելու հետևանքով մարդիկ գլխացավ, սրտխառնոց են ունենում, քանի որ դրանք պլաստմասայից են, որը շատ վտանգավոր է: Ակոցը պետք է օրգանական ապակուց պատրաստված լինի, որ ճառագայթները, որոնք անցնում են դրա միջոցով ու հասնում մեզ, կորեն: Չեմ ասում, որ եթե ակնոցը թանկ է, ուրեմն որակով է: Բայց այդ շատ մատչելիների մեջ որակյալ տարբերակներ չկան»,- ասել է մասնագետը:

Հարցին՝ ո՞ր տարիքից երեխաները արևային ակնոց պետք է կրեն, ակնաբույժը պատասխանել է՝ տարիքային սահմանափակում չկա. «Քանի որ մենք բարձրադիր վայրում ենք ապրում, մեզ մոտ հաճախ է հանդիպում գարնանային կատար հիվանդությունը, որը սկսվում է մոտավորապես փետրվարի կեսերից, շարունակվում մինչև հոկտեմբեր։ Այդ հիվանդությամբմ հիվանդանալուն ավելի շատ հակված են տղա երեխաները: Բուժումից բացի, նաև պետք է աչքերը պաշտպանվեն ուլտրամանուշակագույն ճառագայթներից, իսկ դա պետք է արվի արևային ակնոցների միջոցով: Ամենափոքր տարիքից կարելի է կրել: Երեխա կա՝ մեկ տարեկանից դուրս է գալիս փողոց, աչքերից արցունք է գնում: Բնականաբար, այդ տարիքում երեխայի աչքերը պետք է պաշտպանել»:

Ակնաբույժը նշել է նաև՝ որոշ հետազոտություններ ցույց են տալիս, որ արևի ճառագայթների 25%-ը մենք ստանում ենք մանկության տարիներին։ Բացի դրանից, ուլտրամանուշակագույն ճառագայթներից երեխաների աչքերի ցանցաթաղանթը ավելի շուտ է վնասվում, քանի որ ակնաբյուրեղն ավելի պարզ է և թույլ է տալիս, որ ճառագայթները թափանցեն մինչև ակնահատակ:

Բժշկուհին հորդորում է կրել արևապաշտպան ակնոցներ անգամ ստվերում․ թեև ստվերը նվազեցնում է ՈՒՃ-ի և «կապույտ լույսի» ազդեցությունը, այնուհանդերձ, աչքերը կարող են այլ մակերեսներից անդրադարձվող ճառագայթներից վնասվել։