Չինաստանն առայժմ մտադիր չէ ճանաչել թալիբների կառավարությունը

Չինաստանը չի պլանավորում մոտ ապագայում ճանաչել Աֆղանստանում «Թալիբան» շարժման կողմից ձևավորված կառավարությունը: Պեկինը սպասում է, որ Աֆղանստանի տարածքն այլ պետությունների վրա հարձակվելու համար չօգտագործելու նրանց խոստումը գործնականում հաստատվի: «РИА Новости»-ին այս մասին ասել է Աֆղանստանի հարցերով Չինաստանի հատուկ ներկայացուցիչ Յուե Սյաոյունը:

Նա Կատարում մասնակցել է 20 երկրների հատուկ պատվիրակների և ՄԱԿ-ի գլխավոր քարտուղարի`Աֆղանստանին նվիրված երկօրյա հանդիպմանը։ Հանդիպումն իր տեսակի մեջ առաջինն էր այն բանից հետո, երբ 2021 թ.-ի օգոստոսին Աֆղանստանում իշխանությունը զավթեցին թալիբները:

«Չինաստանի համար «Թալիբան» շարժման կողմից ձևավորված կառավարության ճանաչման հարցը չի կարող լուծվել մոտ ապագայում, բայց դա չի նշանակում, թե մենք չպետք է ակտիվորեն փոխգործակցենք Աֆղանստանի իշխանությունների հետ: Երկիրը, որը 20 տարի տառապել է բռնազավթումից, այժմ հնարավորություն է ստացել տնօրինել իր ճակատագիրը: Մենք հարգանք ենք ցուցաբերում այս երկրի, նրա ինքնիշխանության և տարածքային ամբողջականության նկատմամբ, բայց ժամանակ կպահանջվի, որպեսզի Չինաստանը տեսնի, թե ինչպես է այս երկիրը խառնակ վիճակից դուրս եկել 20 տարվա բռնազավթումից հետո... Նրանք պետք է գործնականում խզեն հարաբերությունները ահաբեկչական խմբավորումների հետ: Մինչ այժմ նրանք չեն ընդունել հիմնական օրենքը, որով այս երկիրը կկառավարվի: Մենք բարձր ենք գնահատում Աֆղանստանի կառավարության խոստումը` չօգտագործել իրենց տարածքը հարձակումների համար, միևնույն ժամանակ մենք ակնկալում ենք, որ այս խոստումը «հաստատվի պրակտիկայով»,-ասել է նա։

Դրա հետ մեկտեղ նա նշել է, որ «Աֆղանստանի կառավարության ճանաչման հարցը պետք է որոշի յուրաքանչյուր երկիր առանձին-առանձին, այլ ոչ թե հավաքական կերպով»։ Չինաստանի հատուկ պատվիրակի խոսքով՝ Աֆղանստանի իշխանությունների հետ հարաբերությունների ներկա փուլում Պեկինի առաջնահերթությունը ոչ թե նրանց ճանաչելն է, այլ մարդկանց օգնելը։