Ֆրանսիայի արտգործնախարարն այցելել է Ջերմուկ (տեսանյութ)

Պաշտոնական այցով Հայաստանում գտնվող Ֆրանսիայի արտաքին գործերի նախարար Կատրին Կոլոննան Ջերմուկում է, որտեղ հանդիպում է ունեցել ՀՀ զինված ուժերի գլխավոր շտաբի պետ Էդվարդ Ասրյանի և Հայաստանում ԵՄ դիտորդական առաքելության ներկայացուցիչների հետ։ Նրան ուղեկցում է ՀՀ ԱԽ քարտուղար Արմեն Գրիգորյանը։

Ինչպես հաղորդում է «Արմենպրես»-ը, հանդիպման ընթացքում Կոլոննան կարևոր է որակել ՀՀ-ում ԵՄ դիտորդական առաքելության աշխատանքն ու դրական գնահատել Հայաստանի և դիտորդական առաքելության համագործակցությունը։

«Մեզ համար դրական արդյունքներ է տալիս այդ աշխատանքը։ Այն մեզ հնարավորություն է տալիս դիտորդական աշխատանքի շնորհիվ տեղից տեղեկություններ ստանալ, որոնք օգտակար են ԵՄ անդամ պետությունների համար։ Սա դիտորդական առաքելություն է, զինված առաքելություն չէ, նպատակը պարզապես հետևելն է իրավիճակին, սակայն ամեն դեպքում այդ ներկայությունը հնարավորություն է տալիս լարվածությունը թուլացնել»,- հավելել է Կատրին Կոլոնան։

Իր հերթին ՀՀ ԶՈւ ԳՇ պետն ընդգծել է, որ բարձր է գնահատում Եվրամիության դիտորդական առաքելության աշխատանքը Հայաստանում․

«Միանշանակ, ես բարձր եմ գնահատում Եվրամիության դիտորդական աշխատանքը Հայաստանի Հանրապետությունում։ Այդ աշխատանքով Ադրբեջանի զինված ուժերը իրենց առավել զսպված են զգում։ Այնպես որ շատ լավ է ստացվում աշխատանքը Հայաստանի սահմանների երկայնքով»։

Մանրամասները՝ տեսանյութում։