Լիտվայի Սեյմն օրինականացրել է անօրինական միգրանտների արտաքսման ընթացակարգը

Լիտվայի Սեյմը (խորհրդարանը) օրինականացրել է անօրինական միգրանտներին արտաքսելու ընթացակարգը: Այսօր կայացած լիագումար նիստում օրենսդրական նախաձեռնությունը պաշտպանել է 86 պատգամավոր, 20 հոգի ձեռնպահ է մնացել, 8-ը դեմ է արտահայտվել։ «Արմենպրես»-ն այս մասին տեղեկանում է ТАСС գործակալությունից:

Նշվում է, որ միգրանտները վերջին երկու տարիներին, հիմնականում ասիական և աֆրիկյան երկրներից, զանգվածաբար փորձում են Բալթյան Հանրապետության տարածքում հայտնվել հարևան Բելառուսից։

Ընդունված փաստաթղթի համաձայն՝ Լիտվայի ուժային կառույցներին թույլատրվել է իշխանությունների կողմից հայտարարված ծայրահեղ իրավիճակի կամ արտակարգ դրության պայմաններում հետ մղել չսահմանված վայրերում պետական ​​սահմանը հատող միգրանտներին։

Այս մարտավարությունը Լիտվայի ուժայինները, հիմնականում՝ Ներքին գործերի նախարարությանն առընթեր պետական ​​սահմանապահ ծառայության աշխատակիցները, կիրառում են 2021 թ.-ի օգոստոսից։ Այս ընթացքում ավելի քան 20 հազար մարդ վերադարձվել է Բելառուս։ Սակայն դա արվել է ներքին գործերի նախարարի հրամանի հիման վրա, իսկ հետո՝ կառավարության կարգադրությամբ։

Իրավապաշտպանները քննադատում են այս գործելակերպը՝ պնդելով, որ դա հակասում է միգրացիայի վերաբերյալ միջազգային ակտերին։

Պետական ​​սահմանի մասին օրենքում փոփոխություններն ուժի մեջ կմտնեն մայիսի 3-ից, սակայն դրանք դեռ պետք է իր ստորագրությամբ հաստատի Լիտվայի նախագահ Գիտանաս Նաուսեդան։