Գրիգորի Խաչատուրովը կալանքի տակ է միայն այն պատճառով, որ ինքը Գրիգորի Խաչատուրովն է․ Միհրան Պողոսյան․ 168.am

Փաստաբան Միհրան Պողոսյանը ներկայացրել է գեներալ-մայոր Գրիգորի Խաչատուրովին առաջադրված մեղադրանքի և նրան կալանավորելու որոշման կեղծ հիմքերը:

168.am-ի հետ զրույցում վերջինս թվարկել է այն բոլոր կեղծ պնդումները, որը գլխավոր դատախազ Աննա Վարդապետյանը Գրիգորի Խաչատուրովի վարույթի վերաբերյալ ներկայացրել է Ազգային ժողովում (ԱԺ):

«Կեղծ պնդում՝ համար 1. Պաշտպանության նախարարությունը Գրիգորի Խաչատուրովին վաճառել է զորամաս: Այդ տեղեկությունը սուտ է: Նախ, ՊՆ-ն Գրիգորի Խաչատուրովին որևէ բան չի վաճառել, երկրորդը՝ վաճառվածը զորամաս չի հանդիսացել երբևիցե, այլ եղել է ՊՆ-ի հաշվեկշռում գտնվող անշարժ գույք»,- ասել է Միհրան Պողոսյանը՝ հավելելով, որ նշված տարածքը ՊՆ-ն իր կարիքների համար վերջին անգամ օգտագործել է 1995-1996թթ., և այդտեղ երբևէ որևէ դասակ, մարտկոց կամ այլ զորամիավորում տեղակայված չի եղել, քանի որ գտնվել է սահմանին շատ մոտ, և բացառված էր, որ ՊՆ-ն հրաձգային զենքի ուղիղ նշանառության տակ տեղակայեր որևէ զորամաս:

Փաստաբանի խոսքով՝ երկրորդ կեղծ պնդումն այն է, թե իբրև Գրիգորի Խաչատուրովը նշված տարածքի համար բանկից ստացել է 18 միլիոն դրամ գումար:

«Այս պնդումը ևս սուտ է, քանի որ 18 միլիոն դրամ վարկ այդ գույքի համար երբևիցե չի ստացվել: Այն երբեք չի հանդիսացել 18 միլիոն դրամի ապահովագրության միջոց»,- ասել է Միհրան Պողոսյանը:

Մյուս կեղծ պնդումը, որն արել է գլխավոր դատախազ Աննա Վարդապետյանն ԱԺ-ում, եղել է այն, որ նշված գույքը, իբրև թե, մինչ այժմ գրավադրված է:

Միհրան Պողոսյանը ընդգծում է՝ նման սուտ պնդումներով Գրիգորի Խաչատուրովին թիրախավորելու «հիմք» են փորձել ստեղծել:

Մեկ այլ հանգամանք, որը շատ կարևոր է Գրիգորի Խաչատուրովի գործի հետ կապված, այդ գործի վաղեմության ժամկետի շեմն է։

«Այս գործով վաղեմության ժամկետը լրանում է 2024թ. հունվարին: Գործով դատավճիռ հրապարակելու համար ՀՀ եռաստիճան դատական համակարգն ունի ընդամենը 8 ամիս: Բացառված է, որ այս ծավալի, այս բարդության քրեական գործն անցնի եռաստիճան դատական համակարգով ու կայացվի վերջնական դատական ակտ: Եթե ինչ-որ կերպ այս գործով Գրիգորի Խաչատուրովը դատապարտվի ենթադրյալ մեղսագրված արարքի համար, նրա նկատմամբ պատիժ չի կարող սահմանվել՝ վաղեմության ժամկետն անցած լինելու հիմքով: Իսկ առանց դրա անձին կալանքի տակ պահելը ոչ այլ ինչ է, քան առանց նպատակի անձի նկատմամբ պատժի իրականացում, ինչն արգելված է Եվրոպական կոնվենցիայով:

Ըստ փաստաբանի՝ սա չնշանակված պատժի տարրեր է պարունակում իր մեջ:

Միհրան Պողոսյանը նշել է նաև, որ Գրիգորի Խաչատուրովի նկատմամբ իրականացվում է հետապնդում՝ անձնական վրեժով պայմանավորված, և հատկանշական է քրեական գործով անցնող մյուս անձանց կարգավիճակները:

«Այս քրեական գործով մոտ 13 մեղադրյալ կա: Կան անձինք, որ մեղադրվում են նույնական հանցագործությունների կատարման մեջ, ինչը մեղսագրված է Գրիգորի Խաչատուրովին, բայց որևէ մեկի նկատմամբ կալանավորումը՝ որպես խափանման միջոց, ընտրված չէ, բացի Գրիգորի Խաչատուրովից: Գրիգորի Խաչատուրովը կալանքի տակ է միայն այն պատճառով, որ ինքը Գրիգորի Խաչատուրովն է: Բարձրագույն դատական խորհրդի (ԲԴԽ) անդամ Մեսրոպ Մակյանի կողմից վերաքննիչ բողոքի հրապարակման օր էր նշանակվել մարտի 13-ը, սակայն 3 օր շարունակ որևէ տեղեկություն չկար՝ ինչ որոշում է կայացրել դատարանը: Երբ ուսումնասիրում ենք Մեսրոպ Մակյանի որոշումը, տեսնում ենք, որ դատավորը ստանձնել է լրացուցիչ դատախազի դերակատարումը: Այսինքն՝ սա գծագրված գործողությունների շղթա էր, որի արդյունքում ամեն կերպ փորձում էին հասնել Գրիգորի Խաչատուրովի կալանավորմանը և վերջում որպես գործիք օգտագործեցին Մեսրոպ Մակյանին և հասան կալանավորման»,- եզրափակել է փաստաբանը։