Թիմի արդյունքները չեն հաստատում Ինտերի լավ ելույթները․ Ինձագի

«Ինտերի» գլխավոր մարզիչ Սիմոնե Ինձագին մեկնաբանել է Ա Սերիայի 30-րդ տուրում «Մոնցայից» կրած պարտությունը (0-1).

«Թիմը լավ խաղաց առաջին խաղակեսում և արժանի էր հաշվի մեջ առաջ անցնելու: Բայց հետո մենք սկսեցինք նյարդայնանալ ու կորցնել գնդակը։ Բացասական արդյունքը միայն դանդաղեցնում է մեզ:

Վիճակագրությունը ցույց է տալիս, որ լիգայի հանդիպումներում ելույթներն ավելի լավ են, քան Չեմպիոնների լիգայում և Իտալիայի գավաթում։ Բայց արդյունքները չեն հաստատում դա, և սա հիասթափեցնող է։ Հիմա այն, ինչ մենք անում ենք, բավարար չէ, և այն, որ Օչոան, Դրոնգովսկին, Դի Գրեգորիոն և այլ դարպասապահներ անընդհատ դառնում են հանդիպումների լավագույն խաղացողներ, դա հաստատում է։

Թիմը գիտի, որ առաջնությունում պետք է միավորներ վաստակել և հաղթանակներ գրանցել։ 2023 թվականին մենք մեր մակարդակով չենք հանդես գալիս։ Մենք կանոնավոր կերպով գոլեր խփեցինք 16 ամիս, ունեինք առաջնության լավագույն հարձակման գիծը, իսկ հիմա մեր արդյունավետությունը նվազել է: Թիմը շանսեր է ստեղծում, բայց վճռականություն է պետք դրանք օգտագործելու համար։

Առաջնությունում մենք 2 միավորով հետ ենք «Միլանից», բայց ամեն ինչ ունենք Չեմպիոնների լիգայի գոտում տեղ զբաղեցնելու համար։ Այնուամենայնիվ, «Սան Սիրոյում» կրած միավորների կորուստները պետք է անհանգստության տեղիք տան:

Մենք լավ թիմ ունենք, որը կատարել է առաջադրանքը, և մենք շարունակում ենք պայքարը Իտալիայի գավաթում և Չեմպիոնների լիգայում։ Ճիշտ չէ այն կարծիքը, որ եվրոպական մրցաշարերում մենք ունենք մեկ մակարդակի մոտիվացիա, իսկ առաջնությունում՝ մեկ այլ»,- Ինձագիի խոսքերն է մեջբերում La Gazzetta dello Sport-ը։ Հաղորդում է ArmSport. am-ը։