ԱՄՆ Կոնգրեսը պատժամիջոցներ է մշակում Օրբանի կողմնակիցների դեմ. The Guardian

ԱՄՆ Կոնգրեսը պատժամիջոցների նախագիծ է մշակում Հունգարիայի վարչապետ Վիկտոր Օրբանի քաղաքական կողմնակիցների դեմ՝ կապված «Ֆիդես» կուսակցության հետ: Սահմանափակումների ցանկում կարող են ներառվել նաև նախկին պաշտոնյաները։ Այս մասին հայտնում է բրիտանական The Guardian թերթը։

Նախագիծը պետք է ներկայացվի օրենսդիրներին արդեն հաջորդ ամիս, և, ամենայն հավանականությամբ, կարժանանա Կոնգրեսի լայն աջակցությանը:

Ավելի վաղ Հունգարիայի վարչապետ Վիկտոր Օրբանը հայտարարել էր, որ եվրոպական երկրները տասնյակ միլիարդավոր դոլարներ են ծախսում Ուկրաինայի վրա, որից տուժում է եվրոպական տնտեսությունը։ «Մենք վճարում ենք ուկրաինացիների կենսաթոշակները, հաշիվները, ֆինանսավորում ենք պետական ​​հաստատությունները, առողջապահությունը, կրթությունը»,- ասել է վարչապետը:

Հունգարիայի կառավարությունը դեմ է Ուկրաինայի՝ ՆԱՏՕ-ին անդամակցելուն և համաձայնել է աջակցել՝ պայմանով, որ Կիևը վերականգնի հունգարական փոքրամասնության իրավունքներն Ուկրաինայի տարածքում։ Հունգարիայի նախարարների կաբինետն իր պահանջի մասին հայտարարել է դաշինքի անդամ երկրների արտգործնախարարների հանդիպման ժամանակ։