Թրամփը կասկածում է, որ Բայդենը կփորձի վերընտրվել երկրորդ ժամկետով

ԱՄՆ-ի նախկին նախագահ Դոնալդ Թրամփը կասկածներ ունի այն հարցի շուրջ, որ Միացյալ Նահանգների ներկայիս ղեկավար Ջո Բայդենը կառաջադրի իր թեկնածությունը 2024 թ.-ի նախագահական ընտրություններում։ «Արմենպրես»-ի փոխանցմամբ՝ Թրամփը նման կարծիք է հայտնել Fox News հեռուստաալիքի հաղորդավար Թաքեր Կառլսոնին տված հարցազրույցում։

Բայդենը բազմիցս ակնարկել է, որ կառաջադրվի հաջորդ նախագահական ընտրություններում, սակայն դեռ պաշտոնական հայտարարություն չի անում:

Օրերս NBC հեռուստաալիքի TODAY ծրագրի ընթացքում լրագրողը հարցրել է գործող նախագահին՝ արդյոք նա պլանավորում է Սպիտակ տանն անցկացվող Զատկի միջոցառումներին մասնակցել 2024 թ.-ից հետո։

Բայդենը պատասխանել է. «Ես պլանավորում եմ իմ թեկնածությունն առաջադրել: Բայց մենք դեռ պատրաստ չենք այդ մասին հայտարարել»:

Անդրադառնալով այս հարցազրույցին՝ Թրամփը նշել է. «Այստեղ ինչ-որ բան այն չէ»:

«Ես այսօր հեռուստացույցով տեսա նրա պատասխանն այն հարցին՝ արդյոք նա պատրաստվում է առաջադրվել թե ոչ… Նա երկար պատասխան տվեց (Զատիկի) ձվերի և տարբեր բաների մասին: Չեմ կարծում, թե նա կկարողանա», - նշել է նախկին նախագահը:

Թրամփը շեշտել է, որ պարզ չէ՝ արդյոք Բայդենը կարող է ևս մեկ ընտրարշավի դիմանալ:

76-ամյա Թրամփը, որը մինչև Բայդենի ընտրվելը նախագահի պաշտոնը ստանձնած ամենատարեց նախագահն էր, արդեն հայտարարել է 2024 թ.-ին իր թեկնածությունն առաջադրելու մտադրության մասին։ 80-ամյա Բայդենն առայժմ պաշտոնական հայտարարություն չի արել։

ԱՄՆ-ի նախագահական ընտրությունները տեղի կունենան 2024 թ.-ին: Մինչ այդ յուրաքանչյուր կուսակցություն պետք է անցկացնի ներքին ընտրություններ՝ փրայմերիզ, որտեղ էլ կորոշվի, թե ով է տվյալ կուսակցության կողմից մասնակցելու նախագահական ընտրապայքարին։