Գործով առերեսումները կիսատ են թողել եւ գործի ավարտ հայտարարել, դա բացառիկ դեպք է. Միքայել Արզումանյանի փաստաբան. News.am

Արցախի պատշպանության բանակի նախկին հրամանատար, գեներալ-լեյտենանտ Միքայել Արզումանյանի վերաբերյալ քրեական գործի նախաքննության ավարտ է հայտարարվել մի այնպիսի պայմաններում, երբ դեռեւս բազմաթիվ էական գործողություններ կային անելու: Այս մասին NEWS.am-ի հետ զրույցում ասաց Արզումանյանի փաստաբան Երեմ Սարգսյանը:

«Երբ Արզումանյանի կալանքի ժամկետը երկարացնելու միջնորդությունն էր քննվում դատարանում, նախաքննական մարմինը հայտարարել էր, թե բազմաթիվ գործողություններ կան անելու, որոնց թվում՝ բազմաթիվ առերեսումներ Միքայել Արզումանյանի եւ այլոց միջեւ: Կալանքի ժամկետը երկարացնելուց հետո այդ գործողությունները չկատարվեցին: Այսինքն՝ ստացվում է, որ դատարանին ներկայացնելիս ասում են՝ կարեւոր գործողություններ կան անելու, երկարացրեք, բայց 1 ամիս չանցած նախաքննության ավարտ են հայտարարում»,- նշեց Սարգսյանը:

Փաստաբանի խոսքվ՝ քրեական գործով առերեսումների ժամանակ գործով վկաներ հերքել են, նախկինում տված իրենց ցուցմունքները. «Տպավորություն էր, որ այս առերեսումների արդյունքում ամբողջ քրեական գործը հերքվում է, եւ մեղադրանքն էլ, պարզվում է, անհիմն է: Կարծում եմ՝ դա էր նպատակը, որ առերեսումները չշարունակվեցին: Եվ կային առերեսումներ, որոնք կիսատ են մնացել: Սա բացառիկ դեպք է, ես նման բան չեմ տեսել, որ գործով առերեսումն առանց ավարտելու գործի ավարտ հայտարարեն: Ակնհայտորեն առաջադրված մեղադրանքները հերքվել են, եւ այդ մեղադրանքով գործը դատարան ուղարկելն իրավական նպատակ չի կարող ունենալ»:

Անդրադառնալով նախաքննական մարմնի այն պնդումներին, թե Արզումանյանը նահանջի հրաման է տվել գրավված «Արեգա» բարձունքից, Երեմ Սարգսյանն ասաց, որ դա միայն նախաքննական մարմնի վարկածն է. «Այն, որ իրենք ասում են՝ այդպես է եղել, դա դեռ չի նշանակում, թե այդպես է եղել: Եթե քննությունը օբյեկտիվ եւ լիարժեք կատարվեր, իրենք էլ ապացույցների ճնշման ներքո ստիպված կլինեին հրաժարվել գործից: Այդ բարձունքը գրավված չի եղել, որ մի հատ էլ նահանջի հրաման տար, ասում են, թե «Արեգա» բարձունքը գրավվել է մեր կողմից, Արզումանյանը ասել է՝ նահանջեք, ինչը բացարձակ այդպես չի եղել»:

Անդրադառնալով վարչապետ Նիկոլ Փաշինյանի այն հայտարարությանը, թե 44-օրյա պատերազմին բանակում 5-րդ շարասյուն է եղել, փաստաբանն ասաց. «Որեւէ մեկը, որը Միքայել Արզումանյանին կհամարի 5-րդ շարասյուն, ինքը ոչ միայն չարաչար սխալվում է, այլեւ դիտավորյալ իրականությանը չհամատասխանող տեղեկություններ է տարածում: Միքայել Արզումանյանն իր կյանքը 16 տարեկանից նվիրել է Արցախի եւ Հայաստանի պաշտպանությանը: Երբ 44-օրյա պատերազմի ժամանակ Ջալալ Հարությունյանը վիրավորում ստացավ եւ թշնամին հասել էր Արցախ, այդ ծանրագույն շրջանում ՊԲ հրամանատար է նշանակվել Արզումանյանը, կան հստակ փաստեր, որ սկզբի մեկ շաբաթն իրավիճակը հստակ կայունացել է՝ ի օգուտ Արցախի, հայկական կողմի զոհերի թիվը 2-3 անգամ կրճատվել է, բազմաթիվ կյանքեր են փրկվել, եւ թշնամին լուրջ խնդիրներ է ունեցել առաջխաղացման հետ կապված»:

Հիշեցնենք` օգոստոսի 30–ին Միքայել Արզումանյանը ձերբակալվել էր Շուշի քաղաքի եւ հարակից շրջանների պաշտպանության կազմակերպման ընթացքում պաշտոնեական անփութություն կատարելու մեղադրանքով։

Ըստ ՔԿ-ի` գեներալ-լեյտենանտը 2020 թվականի հոկտեմբերի 30-ից մինչեւ նոյեմբերի 9-ը Շուշիի եւ հարակից շրջանների պաշտպանության կազմակերպման ընթացքում անփույթ վերաբերմունք է դրսեւորել իր ծառայողական պարտականությունների նկատմամբ՝ չկատարելով եւ ոչ պատշաճ կատարելով դրանք, ինչը անզգուշությամբ առաջացրել է ծանր հետեւանքներ։

Օգոստոսի 31–ին Արզումանյանի ձերբակալման ժամկետը լրացել էր, նա ազատ էր արձակվել, սակայն նրան կալանավորելու միջնորդություն էր ներկայացվել դատարան, եւ սեպտեմբերի 1-ին Արզումանյանը կալանավորվել է:

Նշենք, որ Արզումանյանը ՊԲ հրամանատար նշանակվեց 44-օրյա պատերազմի վերջին փուլում՝ 2020թ. հոկտեմբերի 27-ին` փոխարինելով Ջալալ Հարությունյանին, պաշտոնից ազատվեց 2021թ. սեպտեմբերին։