Կա՞ արդյոք կրծկալ կրելու և կրծքագեղձի քաղցկեղի առաջացման միջև որևէ կապ. պարզաբանում է բժիշկը

Ըստ ամերիկյան առողջապահության հետազոտությունների ազգային կենտրոնի, խոսակցություններն ու վարկածներն այն մասին, որ կրծկալ կրելը կարող է առաջացնել կրծքագեղձի քաղցկեղ, հերքվել են մի շարք ուսումնասիրությունների արդյունքում։

Կրծքագեղձի քաղցկեղը կրծքագեղձի գեղձային հյուսվածքի չարորակ նորագոյացություն է։ Այն աշխարհում կանանց շրջանում քաղցկեղի ամենատարածված տեսակն է, հանդիպում է 13-ից 90 տարեկան կանանց շրջանում: Կրծքագեղձի քաղցկեղի դեպքերի թիվը զարգացած երկրներում կտրուկ աճել է 1970-ականներից հետո, գրել է Aysor.am-ը։

Մի շարք հետազոտողներ պնդում են, թե այն կանայք, ովքեր օրական 12 ժամ կրծկալ են կրում, կրծքագեղձի քաղցկեղով հիվանդանալու շատ ավելի մեծ ռիսկի տակ են, քան այն կանայք, ովքեր չեն կրում, քանի որ ավշային անոթները, սեղմելով, կրծքերում թունավոր նյութերի կուտակում են առաջացնում, որն ի վերջո հանգեցնում է քաղցկեղի։

Այնուամենայնիվ, շատ փորձագետներ և կազմակերպություններ, ինչպիսիք են Ամերիկյան քաղցկեղի միությունը, արդեն հերքել են այս կապը՝ նշելով, որ չկա որևէ ապացույց, որը կհաստատի վարկածը։

Նոր ուսումնասիրության մեջ ամերիկացի հայտնի ուռուցքաբան բժիշկ Չենը և նրա գործընկերները դեմ առ դեմ հարցազրույցներ են անցկացրել 55-74 տարեկան 454 կանանց հետ, ովքեր ունեն կրծքագեղձի ինվազիվ ծորանային քաղցկեղ և 590 կանանց հետ, ում մոտ կրծքագեղձի քաղցկեղի երկու ամենատարածված տեսակներն են եղել: Գիտնականները նաև հարցազրույց են անցկացրել նույն տարիքի կանանց երրորդ խմբի հետ, ովքեր չեն ունեցել կրծքագեղձի քաղցկեղ և կազմել են այս հետազոտության վերահսկիչ խումբը:

Այս հետազոտության ընթացքում հաշվի են առնվել նաև ընտանեկան պատմության և վերարտադրողական պատմության մասին տեղեկությունները:

Հետազոտողները պարզել են, որ կրծկալ կրելը ոչ մի ասպեկտով կապված չէ կրծքագեղձի քաղցկեղի որևէ ենթատեսակի առաջացման հետ:

Ոչ մի կապ չի գտնվել, անկախ նրանից, թե օրական քանի ժամ են կանայք կրծկալ կրել, արդյոք կրծկալում եղել են ներդիրներ և անկախ այն բանից, թե որ տարիքից են նրանք սկսել կրծկալ կրել։

Բժիշկ Չենի խոսքով, ուսումնասիրության դրդապատճառը ոչ բժշկական լրատվամիջոցների տարածած կարծիքն էր, որ կրծկալ կրելը կարող է ռիսկի գործոն լինել կրծքագեղձի քաղցկեղի համար: Այս տեսության շատ թույլ ապացույցները, ըստ ուսումնասիրողների, գիտական արժեք չունեն։

Ընդունված այն կարծրատիպին, որ կրծկալները չեն նվազեցնում կրծքավանդակի ցավը, թուլացնում են կուրծքը պահող մկանները և հանգեցնում կրծքերի թուլացմանը, բժիշկ Չենը արձագանքել է․

«Բժշկական տեսանկյունից, ֆիզիոլոգիայի և անատոմիայի տեսակետից ևս՝ կրծքագեղձերը ոչ մի օգուտ կամ վնաս չեն ստանում կրծկալ կրելուց, եթե, իհարկե, չեն խախտվում նորմայի սահմանները. Անհրաժեշտ է ընտրել համապատասխան չափսը և կրծկալը չկրել ամբողջ օրվա ընթացքում»։