Ռեալը չպետք է մոռանա, որ Լիվերպուլը 7 գոլ է խփել ՄՅՈՒ-ին․ Ռյուդիգեր

Մադրիդի «Ռեալի» կենտրոնական պաշտպան Անտոնիո Ռյուդիգերը կիսվել է Չեմպիոնների լիգայի 1/8 եզրափակչի «Լիվերպուլի» հետ պատասխան խաղի սպասելիքներով, որը կկայանա այսօր՝ մարտի 15-ին, Երևանի ժամանակով ուղիղ կեսգիշերին։ Առաջին հանդիպումն ավարտվել է «սերուցքայինների» հաղթանակով՝ 5:2 հաշվով։

«Մենք պետք է ավելի լավ սկսենք, քան «Էնֆիլդում»: Կարծում եմ, որ մենք պետք է ճիշտ հավասարակշռություն գտնենք պաշտպանության և հարձակման միջև: Շատ կարեւոր է չքնել առաջին 15 րոպեներին, ինչպես դա եղավ վերջին խաղում։ Պետք է ուրախացնենք մեր երկրպագուներին ու վստահություն ձեռք բերենք հանդիպման առաջին րոպեներից։

«Լիվերպուլը» լավ հարձակման գիծ ունի։ Նրանք խաղացին այնպիսի մեծ մրցակցի դեմ, ինչպիսին «Մանչեսթեր Յունայթեդն» էր և խփեցին 7 գոլ, և մենք պետք է հիշենք դա»,- Ռյուդիգերի խոսքերն է մեջբերում մադրիդյան ակումբի պաշտոնական կայքը։