Կրեմլը մեկնաբանել է «Նավալնի» ֆիլմին «Օսկար»-ի շնորհումը

«Նավալնի» վավերագրական ֆիլմին «Օսկար» մրցանակ շնորհելը կարող էր քաղաքական նկատառումներով թելադրված լինել։ Այս կարծիքը լրագրողներին է հայտնել ՌԴ նախագահի մամուլի քարտուղար Դմիտրի Պեսկովը, Tert.am-ի փոխանցմամբ՝ գրում է kommersant.ru-ն:

«Չնայած չեմ նայել, բայց համարձակվում եմ ենթադրել, որ թեմայի քաղաքականացման որոշակի տարր, իհարկե, կա։ Հոլիվուդը ևս երբեմն չի խուսափում իր աշխատանքի քաղաքականացման թեմայից, նման բաներ պատահում են»,- մամուլի ասուլիսի ժամանակ ասել է Կրեմլի ներկայացուցիչը։

Ռեժիսոր Դենիել Ռոերի «Նավալնի» (Navalny) ֆիլմն արժանացել է «Օսկար»-ի «Լավագույն վավերագրական ֆիլմ» անվանակարգում։

Ռուս ընդդիմադիր քաղաքական գործիչ Ալեքսեյ Նավալնիի թունավորման և Ռուսաստան վերադարձի մասին կանադացի ռեժիսոր Դանիել Ռոերի ֆիլմի պրեմիերան կայացել է 2022 թվականի հունվարին Սանդենս անկախ կինոփառատոնում, որտեղ այն արժանացել է հանդիսատեսի մրցանակին։ Այս վավերագրական ֆիլմն արժանացել է նաև բրիտանական Bafta մրցանակին։