Բժիշկն ասել է, թե ինչպես ալկոհոլից հրաժարվելը կօգնի նիհարել

Շաբաթական 175 միլիլիտր ծավալով վեց բաժակ գինի խմելուց հրաժարվելը կօգնի նիհարել, քանի որ կխնայի մոտ 960 կալորիա, Shantnews.am-ի փոխանցմամբ՝ «ՌԻԱ Նովոստիին» ասել է Մոսկվայի առողջապահության դեպարտամենտի նարկոլոգիայի գիտագործնական կենտրոնի տնօրեն Անտոն Մասյակինը:

«Ալկոհոլը, մի կողմից, դանդաղեցնում է նյութափոխանակությունը, իսկ մյուս կողմից՝ հրահրում շատակերություն՝ խթանելով հատուկ AGRP սպիտակուցի արտադրությունը, որը կոչվում է «գիրության սպիտակուց»։ Ուստի սթափությունը նաև խնայված կալորիա է. օրինակ, եթե հրաժարվեք շաբաթական 175 միլիլիտր ծավալով վեց բաժակ գինի խմելուց, Դուք կխնայեք մոտ 960 կալորիա», – պատմել է Մասյակինը։

Բժիշկը նշել է, որ ալկոհոլից հրաժարվելուց մեկ շաբաթ անց մարդը կարող է նկատել, որ սկսել է ավելի լավ քնել։

«Ալկոհոլ ընդունելու ֆոնին մարդը սովորաբար անմիջապես խոր քնի մեջ է ընկնում, Ընդ որում տուժում է «արագ քնի փուլը», որի ժամանակ հայտնվում են երազներ, և որը շատ կարեւոր է ուժերի վերականգնման համար», – ասել է նա:

Այն դեպքում, երբ սովորաբար մեկ գիշերվա ընթացքում պետք է անցնի «արագ» քնի վեց-յոթ փուլ, ալկոհոլը չարաշահող մարդկանց մոտ սովորաբար լինում է միայն մեկ-երկու նման փուլ, ասել է Մասյակինը։

Նա նշել է, որ քնի բարելավումը կօգնի առավոտյան ձեզ ավելի առույգ և եռանդուն զգալ, իսկ օրվա ընթացքում լինել ավելի արդյունավետ, ավելի լավ աշխատել և խնդիրներ լուծել, կբարելավվի հույզերն ու վարքը վերահսկելու ունակությունը:

«Ալկոհոլի օգտագործման դեպքում օրգանիզմում տեղի է ունենում հեղուկի վերաբաշխում, ինչը հանգեցնում է այտուցների և գլխացավերի։ Ալկոհոլից հրաժարվելը թույլ կտա նորմալացնել հեղուկի բաշխումը օրգանիզմում, ինչն իր հերթին բարենպաստ ազդեցություն կունենա ուղեղի վրա։ Ձեր տրամադրությունն ու կենտրոնացումը կդառնան ավելի կայուն, իսկ գլխացավերի հաճախականությունը կնվազի», – պատմել է նարկոլոգը։

Ըստ նրա՝ մարդը չի տառապի նաև ջրազրկման հետևանքներից, ինչպիսիք են մոտիվացիայի նվազումը և հոգնածության ավելացումը, օրվա ընթացքում ավելի շատ էներգիա կլինի:

Բժիշկը նշել է, որ ալկոհոլի չարաշահումը ժամանակի ընթացքում կարող է հանգեցնել զարկերակային ճնշման բարձրացման։ 3-4 շաբաթ սթափությունից հետո զարկերակային ճնշումը կսկսի նվազել, ինչը կարևոր է, քանի որ դա կօգնի նվազեցնել ապագայում առողջական խնդիրների առաջացման վտանգը:

«Չորս շաբաթ ալկոհոլը ձեր սննդակարգից հանելը կօգնի նաև բարելավել լյարդի աշխատանքը: Եթե լյարդի ֆունկցիան շատ չի տուժել, այն կարող է աստիճանաբար վերականգնվել 4-8 շաբաթվա ընթացքում», – հավելել է գործակալության զրուցակիցը։