Արքայադուստր Դիանայի անձնական նամակներն աճուրդում վաճառվել են

Մեծ Բրիտանիայի արքայադուստր Դիանայի անձնական նամակները աճուրդում վաճառվել են 161 հազար ֆունտ ստերլինգով (շուրջ 194 000 դոլար), Tert.am-ի փոխանցմամբ՝ հայտնում է Royal Central պորտալը:

«Դիանա․ արքայադստեր անձնական նամակագրությունը» խորագրով աճուրդում վաճառքի էր հանվել 32 նամակ, որոնցից յուրաքանչյուրը վաճառվել է առանձին։ Նամակները Ուելսի արքայադուստրը գրել էր իր ընկերներ Սյուզիին և Թարիք Քասեմին։ Ընկերների միջև նամակագրական կապն սկսվել է Մեծ Բրիտանիայի ներկայիս թագավոր Չարլզ III-ի հետ բաժանումից երեք տարի առաջ և ավարտվել է նրանց ամուսնալուծությունից անմիջապես հետո։ Բոլոր նամակները գրվել են արքայադուստր Դիանայի գրասենյակում՝ Քենսինգթոնյան պալատում։

Նամակներից մեկում, որը վաճառվել է 28 հազար ֆունտ ստերլինգով, արքայադուստր Դիանան պատմում էր այն սթրեսի մասին, որն ապրում էր ամուսնալուծության պատճառով։

«Եթե ես մեկ տարի առաջ իմանայի, որ պետք է անցնեմ այս ամուսնալուծության միջով, երբեք չէի համաձայնի դրան։ Դա սարսափելի է և զզվելի», - գրել էր նա:

Նշվում է, որ գնորդներից մեկը 15 հազար ֆունտ ստերլինգ է վճարել մի երկտողի համար, որում նա ներողություն էր խնդրում ամուսնալուծության պատճառով մտահոգությունների հետևանքով օպերա չգնալու համար։

Ամուսնալուծությունից հետո գրված նամակներից մեկում, սակայն, Դիանան խոստովանել է, որ երջանիկ է ազատություն ստանալու համար։ Այս նամակը վաճառվել է 3800 ֆունտ ստերլինգով։

«Ավելի քան երջանիկ եմ ազատություն ստանալու և գիտակցելու համար, որ երկրորդ հնարավորություն եմ ստացել։ Ես բազմաթիվ հաճելի զբաղմունքներ ունեմ ու դա զվարճալի է։ Ո՜վ կարող էր մտածել», - գրել էր Դիանան։

Աճուրդում ներկայացված նամակներից ամենաթանկարժեքը, սակայն, ընկերուհուն՝ Սյուզիին ուղղված նամակն էր։ 1996 թվականի վերջին գրված նամակում Դիանան շնորհակալություն էր հայտնել ընկերուհուն Սուրբ Ծննդյան կապակցությամբ ուղարկված ծաղկեփնջի համար և խոստովանել, որ չի սիրում այդ տոնը։

«Հուսով եմ՝ 1997 թվականը բոլորիս համար ավելի թեթև տարի կլինի»,- գրել էր նա։

31 հազար ֆունտ ստերլինգով վաճառված այս նամակը գրվել է արքայադուստր Դիանայի ողբերգական մահից ամիսներ առաջ։ Նա զոհվել է 1997 թվականի օգոստոսին ավտովթարից։