Հանրապետականները Բայդենին խնդրում են 2 միլիարդ դոլար տրամադրել Թայվանին ռազմական օգնության համար

Հանրապետականները ԱՄՆ նախագահ Ջո Բայդենին խնդրել են 2024 թվականի պաշտպանական բյուջեում ներառել Թայվանին ռազմական օգնության դրամաշնորհներ 2 միլիարդ դոլարի չափով:

Այդ մասին հաղորդում է «Արմենպրես»-ը՝ վկայակոչելով Defense News պարբերականին: «Օգտագործելով մեր հնարավորությունները՝ մենք պետք է զինենք Թայվանին, որպեսզի այն ավելի ուժեղ և ավելի կարողունակ գործընկեր դարձնենք, ինչը միայն կօգնի ԱՄՆ-ի ազգային և տնտեսական անվտանգությանը», - մեջբերում է թերթը մի հատված այն նամակից, որը Բայդենին Է ուղարկել ԱՄՆ Կոնգրեսի Սենատի Արտաքին գործերի հանձնաժողովի անդամ Ջիմ Ռիշը (հանրապետական Այդահոյի նահանգից):

Նամակում սենատորը նշել է, որ հարկավոր է դրամաշնորհներ տրամադրել, որպեսզի Թայվանը ձեռք բերի ԱՄՆ պաշտպանական արդյունաբերության արտադրանքը։ 2023 ֆիսկալ տարվա պաշտպանական քաղաքականության օրինագիծն ընդունելիս Կոնգրեսը հաստատել էր Թայվանին տարեկան 2 մլրդ դոլարի տրամադրումը: Սակայն Կոնգրեսի կողմից ընդունված համընդհանուր հատկացումների մասին օրինագիծով այդ անվտանգության աջակցությունը ֆինասնավորվում էր որպես ԱՄՆ-ի կողմից տրամադրվող վարկ, որը Թայբեյը պետք է վերադարձներ 12 տարվա ընթացքում: Այն չէր ներառում դրամաշնորհներ, ինչն, ըստ Ռիշի և նրա երեք համախոհների, բավական չէ՝ լուծելու առկա մարտահրավերը:

Փետրվարի 16-ին ԱՄՆ պաշտպանության փոխնախարար Քեթլին Հիքսը հայտարարել էր, որ Թայվանում հնարավոր հակամարտությանը նախապատրաստվելիս ԱՄՆ իշխանությունները մտադիր են հաշվի առնել ուկրաինական ճգնաժամի դասերը։ Ավելի վաղ Politico թերթը հայտնել էր, որ Բայդենի վարչակազմը ծրագրում է Կոնգրեսից խնդրել 2024 թվականի ռեկորդային պաշտպանական բյուջե՝ սպառազինությունների պաշարների համալրման համար։ Բյուջեի նախագիծը պետք Է հրապարակվի մարտի 9-ին:

Թայվանը սեփական վարչակազմի կողմից կառավարվում է 1949 թվականից, երբ Գոմինդանի ուժերի մի մասը, պարտություն կրելով Չինաստանի քաղաքացիական պատերազմում, Չան Կայշիի (1887-1975) գլխավորությամբ փախավ կղզի։ Պեկինի պաշտոնական դիրքորոշման համաձայն, որը պաշտպանում Է երկրների մեծ մասը, Թայվանը ՉԺՀ-ի նահանգներից մեկն է: