Ի՞նչ է նշանակում փողոցային հասկացողություններով փաստաբաններին ծեծել. Արա Զոհրաբյան

«Երեկ մեր գործընկերներն իրենց մասնագիտական գործունեությունն իրականացնելու ժամանակ ենթարկվել են բռնության։ Ոստիկանության Էրեբունի բաժնում վերջիններիս նկատմամբ կիրառվել է բռնի ուժ, հայհոյանքներ, ըստ էության, խոչընդոտել են իրենց մասնագիտական գործունեությանը»,- հրավիրված հրատապ ասուլիսում հայտարարեց Փաստաբանների պալատի նախագահ Սիմոն Բաբայանը։

Նա նշեց, որ Փաստաբանների պալատը հետևողական է լինելու նմանատիպ բացասական երևույթներին, որոնք իրենց համար անընդունելի են։

«Ըստ էության, որոշ պաշտոնատար անձինք, որոնք աշխատում են նաև ոստիկանության համակարգում, մոռանում են, որ փաստաբանն ունի բացառիկ առաքելություն և այդ առաքելությունը երաշխավորված է Հայաստանի Սահմանադրությամբ։

Մենք իրականացնելու ենք ամեն ինչ մեր գործընկերների խախտված իավունքները պաշտպանելու համար, առհասարակ փաստաբանական ինստիտուտը պաշտպանելու համար, քանի որ այս երևույթները ստվերում են փաստաբանական ինստիտուտը»,- ասաց Սիմոն Բաբայանը։

Ասուլիսին ներկա Փաստաբանների պալատի նախկին նախագահ Արա Զոհրաբյանն ասաց, որ այս երևույթն անհանգստացնող է, քանի որ երկար տարիներ նման միջադեպի հետո չեն առնչվել։

«Ոստիկանները բերման են ենթարկել անչափահասների, մեր գործընկերները գնացել են անչափահասի առերեսմանը, որը պետք է առերեսվեր ոստիկանության օպեր աշխատողի հետ։ Ոստիկանության Էրեբունի բաժնում ոստիկանների ներկայությամբ փորձել են հոգեբանական ճնշում գործադրել փաստաբանների նկատմամբ, փաստաբանին ծաղրել են առերեսման ժամանակ, հետո էլ պրովակացիայի արդյունքում դուրս են հանել և միջանցքում ոստիկաններով հարձակվել են փաստաբանի վրա ու ծեծել են, հայհոյել։ Մյուս փաստաբանը դուրս է եկել ձայների վրա, նրան էլ են սկսել ծեծել, հայհոյել»,- դեպքի մանրամասները ներկայացրեց Զոհրաբյանը։

Նա նշեց, որ Փաստաբանների պալատի նախագահը երեկ գնացել է դեպքի վայր, տեղում փորձել են արդարանալ, որ փաստաբանը վիրավորական խոսք է հնչեցրել, դրա համար, ըստ իրենց, իրենք իրավունք ունեն պատժել։

«Ցանկացած իրավիճակում, ընդունեք, որ փաստաբանը վիրավորական խոսք է ասել ոստիկանին, դրա համար կա Փաստաբանների պալատը, եթե հանցագործություն է պարունակում մեր գործընկերոջ արարքը, ի վերջո կա քրեադատավարական ընթացակարգ։ Ի՞նչ է նշանակում փողոցային հասկացողություններով փաստաբաններին ծեծել։ Սա անընդունելի արարք է, կոչ եմ անում ներքին գործերի նախարարին, ոստիկանության պետին, արագ միջոցներ ձեռնարկել այն բոլոր ոստիկանների նկատմամբ, որոնք ներգրաված են եղել ծեծելու գործընթացի մեջ, նրանց արաքին պետք է գնահատական տրվի։ Բացի քրեաիրավական գնահատականից զատ, առնվազն նրանց լիազորությունները պետք է կասեցվեն, նրանք չեն կարող ոստիկաններ լինել։

Պատկերացնում եք՝ փաստաբանը, որը երկար ժամանակ կրթություն է անցնում, մասնագիտական հմտություն է ստանում, որպեսզի քաղաքացուն պաշտպանի, ինքը պաշտպանության կարիք ունի, կարող է ոստիկանների կողմից բիրտ ուժի թիրախ դառնալ»,- ասաց Արա Զոհրաբյանը։

Ոստիկանների կողմից բռնության ենթրակված փաստաբաններ Մարզպետ Ավագյանի և Էմանուել Անանյանի շահերը ներկայացնող Հրանտ Անանյանն ասաց, որ տեղի ունեցած միջադեպը, դրա շարժառիթը փաստաբանների մասնագիտական գործունեությունն է։

«Տվյալ քննչական գործողության՝ առերես-հարցաքննության ընթացքում, որին մասնակցել են այս երկու փաստաբանները, անչափահաս վկան իր օրինական ներկայացուցչի և հոգեբանի ներկայությամբ ցուցմունքներ է տվել իր հետ առերեսվող ոստիկանության Էրեբունի բաժնի օպեր լիազորի հետ այն մասին, թե ինչպես են իրենց՝ ուսանողներին, նախորդ օրը բիրտ ուժի կիրառմամբ բերման ենթարկել ոստիկանության Էրեբունի բաժին ու իրենց խոշտանգել՝ գլուխը հագուստով ծածկել, ծեծի ենթարկել մի քանի հոգու, գետնի պառկացրել։

Այդ ցուցմունքները տալու ժամանակ օպերա լիազորի մոտ, ով առերեսվում էր անչափահաս վկայի հետ, լարվածություն է կուտակվել։ Լարվածությունը հասել է գագաթնակետին այն ժամանակ, երբ որ անչափահաս ձերբակալվածի պաշտպանները հարցեր են ուղղել օպեր լիազորին դեմքի հանգամանքների ամբողջական բացահայտմանն ուղղված։ Այդ բոլոր հարցերը արձանագրված են քննչական գործողության արձանագրության մեջ, որոնք ամբողջովին կոկիկ են և կոռեկտ, սակայն առերեսվող օպեր լիազորը դրանից էլ ավելի է լարվել։

Քննչական գործողության դռան մուտքի մոտ հավաքված են եղել շուրջ 10 օպերա լիազորներ, որոնք առհասարակ այդտեղ չպետք է գտնվեին։ Մինչև արձանագրությունը ստորագրելը տվյալ օպեր լիազորը դուրս է եկել աշխատասենյակից, միջանցքից սկսել է տարբեր բնույթի վիրավորական, պատիվն ու արժանապատվությունը կասկածի տակ դնող արտահայտություններ անել Մարզպետ Ավագյանի հասցեին։ Նա ընդամենը պարզաբանում է պահանջել, ասել՝ իրար չեն ճանաչում, մասնագիտական բերումով է այստեղ, ինչո՞ւմն է խնդիրը։ Այդ հարցադրումներին հետևում է ագրեսիվ պատասխաններ ու հարձակում Ավագյանի նկատմամբ։

Էմանուել Անանյանը մի քանի վայրկյան անց է դուրս եկել միջանցք, երբ Մարզպետ Ավագայանն շրջափակած են եղել ու ձեռքերով ոտքերով հարվածել են նրան, հորդորել է հանգստանալ բոլորին, ոլորել են նաև նրա ձեռքերն ու հարվածներ հասցրել։ Երբ ձեռքերը ոլորված է եղել, հատկապես առերեսմանը մասնակցած օպեր լիազորը, ինչպես նաև ոստիկանության Էրեբունի բաժնի օպեր գծով տեղակալը հայհոյել են Էմանուել Անանյանին, ձեռքերով հավածել է նրա գլխին։

Սա տևական անընդմեջ շարունակվել է, դադարել է բացառապես քննչական կոմիտեի քննիչների, քանի որ քննչական բաժինը տեղակայված է ոստիկանության Էրեբունի բաժնում, միջամտության արդյունքում։ Հնարավոր է եղել սաստել ոստիկաններին, դադարեցնել այդ պրոցեսը։ Եթե դա էլ չլիներ, կարծում եմ, ավելի ծանր հետևանքներ էին առաջ գալու»,- մանրամասնեց Անանյանը։

Նա նշեց, որ սա ոչ միայն մասնավոր դեպք է, ինստիտուտի դեմ քայլ է, որովհետև մարդկանց ծեծի են ենթարկել իրենց մասնագիտական պարտականությունները կատարելու կապակցությամբ, որևէ ձևով ծանոթ չեն եղել նրանց, նախկինում առնչություն չեն ունեցել։

«Ըստ էության, նաև հետագայում գնացել են, փորձել են արդարանալ, իբր Մարզպետ Ավագյանն է իրեն բացասական վարքագիծ դրսևորել։ Նույն ոճի մեջ են փորձել ներկայացնել, ինչ ոճի մեջ անչափահասներին էին բերման ենթարկել ոստիկանների նկատմամբ բռնության գործադրելու և խուլիգանություն կատարելու կասկածանքով։ Այսինքն սցենարը նույնն է»,- ասաց փաստաբան Հրանտ Անանյանը։

Նա նշեց, որ հարվածներ հասցել են Մարզպետ Ավագյանի մարմնի գրեթե բոլոր մասերին, «ուղղակի հարվածների տեղատարափ է եղել», Էմանուել Անանյանի՝ գլխի, մեջքի շրջանում, հրել են, գցել են։

«Մենք ակնկալում էինք, որ դատաբժշկական փորձաքննության որոշումները շուտ կտրամադրվեն, բայց մինչ այս պահը դեռ չեն տրամադրել»,- ասաց Հրանտ Անանյանը։

Միջադեպի վերաբերյալ հաղորդում է ներկայացվել Քննչական կոմիտե։

Հ.Անանյանը հայտնեց, որ փաստաբանները շարունակելու են անչափահաս ձերբակալվածների շահերի պաշտպանությունը։