Շարունակվում է իշխող ուժի հստակ մոտեցումը՝ ամեն կերպ դադարեցնել Զարուհի Նախշքարյանի լիազորությունները. Մելիքյան․ News.am

Եթե Արդարադատության նախարարությունը ճիշտ է, ապա դատավորները թեկուզ չափավոր ձեւով որեւէ հնարավորություն չունեն անդրադառնալու եւ իրենց անհամաձայնությունը հայտնելու դատավորների՝ բարձր պաշտոնից զրկելու հիմնավորվածությանը: Այս մասին այսօր՝ փետրվարի 9-ին, NEWS.am-ի հետ զրույցում ասաց Երեւան քաղաքի ընդհանուր իրավասության դատարանի դատավոր Զարուհի Նախշքարյանի ներկայացուցիչ, փաստաբան Ռուբեն Մելիքյանը:

Նշենք, որ Զարուհի Նախշքարյանի նկատմամբ 4-րդ կարգապահական վարույթն է հարուցվել: Միջնորդության հիմքը դատավորի հրապարակային խոսքն է, որով նա իր վերաբերմունքն է արտահայտել դատավոր Աննա Փիլոսյանի վերաբերյալ ԲԴԽ-ի կայացրած որոշման առնչությամբ: Ըստ արդարադատության նախարարի՝ նա հրապարակայնորեն կասկածի տակ է առել դատավոր Փիլոսյանի վերաբերյալ ԲԴԽ դատական ակտը։

«Առաջին երեք կարգապահական վարույթները դեռեւս Գագիկ Ջհանգիրյանի ժամակաշրջանում էին հարուցված եղել: Երեք վարույթներից երկուսով ունեցել ենք խախտման բացակայության արձանագրություն, երրորդով ունեցել ենք խախտման արձանագրում եւ խիստ նկատողության կարգապահական միջոցի կիրառում: Այս վարույթը բացառիկ է նրանով, որ դեռեւս որեւէ այլ վարույթով չարձանագրված խախտում է տեղի ունեցել: Մենք արդեն իսկ ունենք իրավիճակ, որ դատավոր Նախշքարյանի դեպքում կա իրավունքների խախտում: Այդ մասով Եվրոպական դատարանը արդեն իսկ քննարկման առարկա է դարձրել այս գործը»,- նշեց Մելիքյանը:

Նրա խոսքով՝ կարգապահական վարույթը հարուցվել է ԲԴԽ նախագահ Կարեն Անդրեասյանի ընկերոջ՝ Արդարադատության նախարար Գրիգոր Մինասյանի կողմից. «Վարույթը վերաբերում է խոսքի ազատության խնդրին: Դատավորը մի շարք հրապարակումներում իր խիստ չափավոր մոտեցումներն է արտահայտել իր գործընկերոջ, դատավոր Աննա Փիլոսյանի նկատմամբ ԲԴԽ-ի կայացրած որոշման մասին»:

Փաստաբանը շեշտեց, որ դա կարող է վերաբերել բոլոր դատավորներին. «Դա նույնն է, եթե արգելես շենքի բնակիչներին խոսել շենքի խնդիրների մասին: Կան կանոններ, որոնք համաձայն դատավորները չեն կարող դիրքորոշում հայտնել իրենց գործընկերների վարույթներում գտնվող վարույթներով, կամ կասկածի տակ դնել դատական ակտերը, բայց դրանք նպատակ չեն հետապնդում դատավորներին արգելել հենց դատավորների վերաբերող խնդիրների մասին խոսելուց: Դատավորները չեն կարող հնարավորություն չունենալ բարձրաձայնել իրենց վերաբերող խնդիրները»:

Մելիքյանը նշեց, որ այդ միջնորդությունը խիստ տարօրինակ է համարում իրավական տեսանկյունից, սակայն հաշվի առնելով Արդարադատության նախարարության եւ Բարձրագույն դատական խորհրդի հարաբերությունները, այդքան էլ տարօրինակ չէ. «Շարունակվում է իշխող ուժի շատ հստակ մոտեցումը՝ ամեն կերպ դադարեցնել Զարուհի Նախշքարյանի լիազորությունները, եւ կարծում եմ՝ ԲԴԽ-ի ներկայիս կազմը լիովին ունի դրա հնարավորությունը, որովհետեւ ԲԴԽ կազմը արդեն ապացուցել է իրավունքի շահերի փոխարեն այլ շահեր սպասարկելու ունակությունները»: