Ադրբեջանը ստորագրել է Սևծովյան էներգետիկ մալուխի կառուցման հրամանագիրը

Ադրբեջանի նախագահ Իլհամ Ալիևը հրամանագիր է ստորագրել Ռազմավարական գործընկերության համաձայնագրի հաստատման մասին, որը, ի թիվս այլ հարցերի, նախատեսում է Կովկասյան տարածաշրջանից դեպի Եվրոպա էներգետիկ մալուխի կառուցում, Aliq Media-ի փոխանցմամբ՝ գրում է BusinessPressNews-ը:

Հարկ է նշել, որ Ադրբեջանի, Վրաստանի, Ռումինիայի և Հունգարիայի կառավարությունների միջև կանաչ էներգիայի զարգացման և փոխանցման վերաբերյալ ռազմավարական գործընկերության համաձայնագիրը ստորագրվել է 2022 թվականի դեկտեմբերի 17-ին՝ Բուխարեստում։

Այսպիսով, նշված համաձայնագիրը մտել է ուժի մեջ, որից հետո Ադրբեջանի էներգետիկայի նախարարությանը հանձնարարվել է ապահովել դրա դրույթների կատարումը։ Բացի այդ, նախագահի հրամանագրի համաձայն՝ Ադրբեջանի արտաքին գործերի նախարարությանը հանձնարարվել է ծանուցել Վրաստանի, Ռումինիայի և Հունգարիայի կառավարություններին՝ ադրբեջանական կողմից համաձայնագրի ուժի մեջ մտնելու համար անհրաժեշտ ներքին ընթացակարգերի կատարման մասին։

Ռազմավարական գործընկերությունը վերաբերելու է Black Sea Energy ստորջրյա էլեկտրական մալուխի կառուցմանը, որը կունենա 1 000 մեգավատ հզորություն և 1 195 կմ երկարություն։ Նախագծի համաձայն՝ ստորջրյա էլեկտրական մալուխի միջոցով Ադրբեջանում արտադրվող կանաչ էներգիան Վրաստանով և Սև ծովով կհասցվի Ռումինիա, այնուհետև՝ Հունգարիա և եվրոպական մյուս երկներ՝ հետագա փոխադրումների միջոցով։

Ներկայումս նախագիծը տեխնիկատնտեսական հիմնավորման փուլում է, որը կավարտվի 2023 թվականի սեպտեմբերին, նրա կառուցումը կտևի 3-4 տարի։

Black Sea Energy-ն աշխարհի ամենաերկար էլեկտրական մալուխը կլինի, որի համար Եվրահանձնաժողովը նախատեսում է հատկացնել 2,3 միլիարդ եվրո։