Ֆրանսիական արհմիությունները փետրվարի 7-ին եւ 11-ին նոր ցույցերի կոչեր են արել

Ֆրանսիական խոշոր արհմիությունները հայտարարել են, որ մտադիր են շարունակել պայքարն ընդդեմ կառավարության առաջարկած կենսաթոշակային ռեֆորմի եւ փետրվարի 7-ին եւ 11-ին նոր ցույցերի կոչ են արել։ Այս հայտարարությունը երեքշաբթի երեկոյան Թվիթերում հրապարակել է «Աշխատանքային ուժ» (FO) արհմիությունը։

«Աշխատանքային ուժի» [արհմիության շենքում] տեղի ունեցած միջարհմիութենական խորհրդակցության արդյունքներով հայտարարվել է մոբիլիզացման երկու օրերի մասին՝ փետրվարի 7-ին եւ 11-ին։ Բոլորը դեմ են կենսաթոշակային ռեֆորմին», նշվել է հայտարարությունում։

Համապատասխան որոշումն ընդունվել է արհմիությունների երկրորդ զանգվածային ցույցի ավարտից հետո։ Ֆրանսիայի ներքին գործերի նախարարության պաշտոնական տվյալների համաձայն՝ ամբողջ երկրում փողոց էին դուրս եկել 1,2 մլն ցուցարարներ՝ 150 հազարով գերազանցելով գործադուլների եւ ցույցերի առաջին օրվա՝ հունվարի 19-ի ցուցանիշը։ Բազմամարդ ցույցեր են տեղի ունեցել Լիոնում, Ռուանում, Մարսելում, Նանտում եւ Մոնպելիեում, սակայն ամենախոշոր ցույցը տեղի է ունեցել Ֆրանսիայի մայրաքաղաքում. Փարիզի ոստիկանության տվյալներով՝ արհմիությունների ցույցին մասնակցել է 87 հազար մարդ։

Արհմիությունները ներկայացնում են իրենց տվյալները, որոնց համաձայն՝ ամբողջ երկրում քայլերթերին եւ ցույցերին մասնակցել է 2,8 մլն մարդ։ Միայն Փարիզում, համաձայն Աշխատանքի հանընդհանուր կոնֆեդերացիայի (CGT)՝ ցույցի էր դուրս եկել մոտ 500 հազար մարդ։ Միեւնույն ժամանակ, Occurrence անկախ մոնիթորինգային կենտրոնը երեքշաբթի օրը Փարիզում հավաքվածների թիվը գնահատել էր 55 հազար մարդ։