Նյու Յորքի ռեստորանատերերը բողոքել են այցելուների տարօրինակ պատվերներից

Նյու Յորքի ռեստորանատերերը բողոքել են բլոգերներից եւ նրանց երկրպագուներից, որոնք, հետեւելով սոցցանցերի թրենդներին, ճաշացանկում առկա հնարավորություններից տարօրինակ ուտեստներ են կազմում, որոնք հնարավոր չէ ուտել, գրում է New York Post-ը։

«Ես չեմ կարող ինձ ստիպել ինչ-որ խելահեղ խնդրանքներ կատարել, հատկապես, երբ դա իմաստ չունի: Դա մեր ԴՆԹ-ում չկա: Ոչ ոք իրար վրա 10 նրբաբլիթ ու 10 կտոր տապակած հավ չի ուտի»,- դժգոհել է Carnegie Diner ռեստորանի սեփականատեր Ստատիս Անտոնակոպուլոսը։

Նրա խոսքով՝ հաճախորդները խնդրում են իրենց համար բարդ եւ գրեթե ոչ ուտելի կերակուրներ պատրաստել՝ սոցիալական ցանցերում բովանդակություն ստեղծելու համար:

«Բանը հասնում է նրան, որ սովորական հաճախորդները, էլ չեմ խոսում TikTok-ը դիտողները, սկսում են մտածել, որ ոչ ազգային հաստատություններում ռեստորանների ճաշացանկերը պարզապես առաջարկ են»,- ասել է Zazzy's Pizza-ի սեփականատեր Ռիչի Ռոմերոն:

Ինչպես նշում է ռեստորանատերը, մարդիկ սկսել են ենթադրել, որ ռեստորաններն ու սրճարանները տարատեսակ ուտեստներով խանութներ են, որոնք կարելի է պատրաստել սեփական ցանկությամբ։ «Նրանք խնդրում են ճամայկայական տավարի կոտլետներ, որոնք կարելի է գնել խանութից մեկ դոլարով, պահանջում են լիարժեք իտալական ուտեստներ եւ, որ ամենավատն է, նրանք խնդրում են հավայան պիցցա՝ արքայախնձորով, որը մենք երբեք չենք անի»,- պարզաբանել է նա:

Այցելուների այս պահանջներն ի հայտ են եկել անհատական պատվերների տարածման հետ, որոնք հարիր են արագ սննդի արդյունաբերությանը: