Բլինքենը մերժել է նոր տարածքները որպես բանակցությունների գրավ ընդունելու ՌԴ պահանջը

Ուկրաինային ուղղված՝ նոր տարածքային իրողությունները ճանաչելու ՌԴ-ի պահանջը չի կարող մեկնակետ հանդիսանալ Ուկրաինայում կարգավորման բանակցությունների համար։ Երեքշաբթի այսպիսի կարծիք է հայտնել ԱՄՆ պետքարտուղար Էնթոնի Բլինքենը։

«Եղել է հռետորաբանություն, որը մի քանի շաբաթներ եւ ամիսներ առաջ է մղում ՌԴ-ն, այն մասին, որ իրենք շահագրգռված են դիվանագիտության հարցում, իսկ Ուկրաինան եւ մենք՝ ոչ։ Դա, իհարկե, բնավ ճիշտ չէ։ Ինձ թվում է՝ բավական է նայել [ՌԴ նախագահ Վլադիմիր] Պուտինի խոսքերին։ Թուրքիայի նախագահ [Ռեջեփ Թայիփ] Էրդողանի հետ վերջերս ունեցած զրույցում նա ասել է, որ քանի դեռ Ուկրաինան չի ճանաչել նոր տարածքային իրողությունները, ինչպես նա է արտահայտվել, պայմանավորվելու բան չկա։ Այլ խոսքով՝ քանի դեռ Ուկրաինան չի ճանաչել եւ չի ընդունել այն փաստը, որ տարածքները չեն վերադառնալու, բանակցություններ վարելու բան չկա։ Սա, հասկանալի է, ինքնին հաջողության շանս չունի [բանակցային գործընթաց սկսելու տեսակետից]»,- պետդեպարտամենտում կայացած բանակցություններից հետո ասել է նա Մեծ Բրիտանիայի արտաքին գործերի նախարար Ջեյմս Քլեւերլիի հետ համատեղ մամուլի ասուլիսում։