Գիտնականներն այլ մոլորակներում կյանք փնտրելու համար լազերային սարք են ստեղծել

Գործիքը, որը կշռում է ընդամենը 8 կգ, երկու կարեւոր գործիքների կրճատված համադրություն է կյանքի նշանները հայտնաբերելու եւ նյութերի կազմը որոշելու համար։ Այն իրենից ներկայացնում է իմպուլսային ուլտրամանուշակագույն լազեր, որը նմուշից գոլորշիացնում է փոքր քանակությամբ նյութ, եւ Orbitrap անալիզատոր, որը վերլուծում է արտանետվող ճառագայթման սպեկտրը՝ քիմիական կազմը որոշելու համար:

«Ի սկզբանե Orbitrap-ը ստեղծվել է կոմերցիոն օգտագործման համար»,-պարզաբանել է գյուտի հեղինակներից մեկը՝ Ռիկարդո Արեվալոն։ Գործիքը կշռում է մոտ 200 կգ, եւ ութ տարի է պահանջվել ավելի փոքր նախատիպ ստեղծելու համար, որը կարող էր արդյունավետ օգտագործվել տիեզերքում։

Նոր սարքն ունի նույն առավելությունները, ինչ իր ավելի մեծ նախորդները, բայց օպտիմիզացված է տիեզերական հետազոտությունների եւ տեղում մոլորակային նյութերի վերլուծության համար:

Իր փոքր զանգվածի եւ էներգիայի նվազագույն սպառման շնորհիվ Mini Orbitrap LDMS գործիքը կարող է դառնալ միջմոլորակային զոնդի օգտակար բեռի մի մասը: Այս մեթոդի կարեւոր առավելությունը սարքի եւ ուսումնասիրվող նմուշի միջեւ ֆիզիկական շփման բացակայությունն է, ինչը վերացնում է աղտոտումը: