Հարավային Կորեայի նախագահը հայտարարել է ԱՄՆ-ի հետ հնարավոր միջուկային զորավարժությունների մասին

Հարավային Կորեան բանակցություններ է վարում ԱՄՆ-ի հետ՝ ամերիկյան միջուկային ուժերի մասնակցությամբ զորավարժությունների համատեղ պլանավորման եւ անցկացման մասին՝ Հյուսիսային Կորեայի միջուկային սպառնալիքին դիմակայելու համար, հայտարարել է Հարավային Կորեայի նախագահ Յուն Սոկ Յոլը։

«Հարավային Կորեան ե ԱՄՆ-ը քննարկում են միջուկային ուժերի համատեղ զորավարժությունների պլանավորման հայեցակարգի կիրառումը»,- ասել է նախագահը «Չոսոն Իլբո» թերթի հարցազրույցում։

Նա նշել է, որ Հյուսիսային Կորեայի միջուկային զենք ունենալուց հետո դժվար է հանգստացնել հարավկորեացի քաղաքացիներին միայն այն հայտարարություններով, թե ԱՄՆ-ը կարող է պաշտպանել իրենց «միջուկային հովանոցի» կամ ընդլայնված զսպման օգնությամբ։ Ուստի, հյուսիսկորեական միջուկային սպառնալիքին ավելի լավ դիմակայելու համար Սեուլը հույս ունի մասնակցել ԱՄՆ միջուկային ուժերի գործողությանը։

«Միջուկային զենքը պատկանում է ԱՄՆ-ին, բայց Հարավային Կորեան եւ ԱՄՆ-ը պետք է տեղեկատվություն փոխանակեն, միասին պլանավորեն եւ իրականացնեն զորավարժությունները։ ԱՄՆ դիրքորոշումն այս հարցում շատ դրական է... Մինչ Հյուսիսային Կորեան միջուկային զենք էր ստեղծում, «միջուկային հովանոցի» եւ «ընդլայնված զսպման» հայեցակարգերն ուղղված էին ԽՍՀՄ-ի եւ Չինաստանի դեմ եւ ենթադրում էին, որ ԱՄՆ-ը ամեն բանի մասին կհոգա, իսկ Հարավային Կորեան անհանգստանալու հիմք չունի։ Հիմա դժվար է համոզել հարավկորեացի քաղաքացիներին նման հայտարարություններով։ ԱՄՆ կառավարությունը նույնպես հասկանում է սա ինչ-որ չափով»,- ասել է Յուն Սոկ Յոլը։

Նա նշել է, որ համատեղ զորավարժությունների քննարկումը չի նշանակում միջուկային զենքի համատեղ օգտագործում, բայց դա մեծ առաջընթաց է ընդլայնված զսպման հայեցակարգի համեմատ, որը ենթադրում է, որ ԱՄՆ-ը պաշտպանում է իր դաշնակիցներին տարածաշրջանում՝ առկա բոլոր հնարավորություններով, այդ թվում միջուկային։